Uviečary 24 lipienia minaki źviarnuli ŭvahu na mašynu chutkaj dapamohi pobač z mahiloŭskaj kramaj «Jeŭraopt» na praśpiekcie Dzimitrava. Dapamoha spatrebiłasia dziadulu — u sacsietkach pišuć, što miedyki nie zmahli jaho vyratavać. A taksama, što piensijanier pryjšoŭ u kramu, kab vyratavać žonku, jakuju supracoŭniki «Jeŭraopta» złavili na kradziažy, paviedamlaje «Jeŭraradyjo».
«Siońnia staŭ śviedkam, jak u «Jeŭraopcie» zatrymali babulu, jakaja chacieła ciškom vynieści pradukty. Babula kupiła faršu na raźvies, i pradavačka ŭpilnavała, što jana schavała pakiet u sumku, a sama pajšła ŭ bok vychadu. Nu i niejak chucieńka padniali šum, pabiehli, zabłakavali vychad z kramy, vyklikali achovu, — apisvaje zdareńnie žurnalist Aleś Sabaleŭski. — Babula, viadoma, pačała prasicca, prapanoŭvała zapłacić, skardziłasia na kiepskaje samaadčuvańnie, ale ŭsio ž na heta nie pajšli, dačakalisia milicyju».
Fota: Aleś Sabaleŭski / www.facebook.com/AliesSabalieuski
Praz paŭhadziny da kramy padjechała mašyna chutkaj dapamohi. Vidavočcy raspaviadajuć, što historyja skončyłasia trahična.
«Na nastupny dzień ja pryjšoŭ u kramu, kab daviedacca, čym usio vyrašyłasia. Kasirki raspaviali mnie, što babula nie adkazvała na pytańni, nie chacieła kazać, chto jana. Pazvaniła mužu, jaki pryjšoŭ, kab abaranić jaje. Ale jon tak raschvalavaŭsia, što pamior na łavačcy la kramy», — raspaviadaje Jeŭraradyjo Aleś Sabaleŭski.
Naturalna, kraści tavary z kramaŭ — heta drenna. Ale ci varta było praz kavałak faršu davodzić situacyju da takoj raźviazki? Jeŭraradyjo źviarnułasia pa kamientaryj u «Jeŭraopt». Ale tam padumali, i adkazali, što nie chočuć «vynosić śmiećcie z chaty».
Fota: Aleś Sabaleŭski / www.facebook.com/AliesSabalieuski
U milicyi Jeŭraradyjo paćvierdzili, što abodva incydenty, kradziež u kramie i śmierć la kramy, mieli miesca. Ale na pytańnie, ci źviazanyja jany, va UUS Mahiloŭskaha abłvykankama adkazać nie zmahli. A paśla ŭvohule admovilisia ad kamientaryjaŭ, skarystaŭšysia nadumanaj pryčynaj: maŭlaŭ, adkul my viedajem, što nam telefanuje žurnalist.
