Choć kiraŭnika dziaržavy ŭ horadzie nad Sožam tak i nie dačakalisia, ale čakali na praciahu tydnia davoli aktyŭna.
Čutki pra toje, što adkryćcio novych korpusaŭ dziciačaj balnicy pavinien naviedać sam Łukašenka ŭ Homieli źjavilisia ŭ kancy minułaha tydnia. Adnak pieradavalisia, što nazyvajecca, z vusnaŭ u vusny. Pieršaja infarmacyja pra mahčymy vizit źjaviłasia ŭ aŭtorak, 24 lipienia.
Tady «Silnyje novosti», hruntujučysia na infarmacyi čytačoŭ, jakija pražyvajuć na centralnych vulicach horada, paviedamili, što ludziam pačali prychodzić piśmovyja papiaredžańni ab tym, jak treba pavodzić siabie ŭ dzień pryjezdu vysokaha hościa, to bok, 27-ha lipienia ŭ piatnicu. Stroha zabaraniałasia adčyniać vokny, dy i naohuł nie padychodzić da ich.
Haradskaja DAI papiaredziła hramadzian pra budučyja prablemy. U pryvatnaści, ich zaklikali «nabracca ciarpieńnia» i pieraciarpieć budučyja abmiežavańni ruchu pa vulicy Savieckaj. Praŭda, kali mienavita daviadziecca ciarpieć, u jaki dzień i ź jakoha času, nichto nie papiaredžvaŭ.
U sieradu paśla abiedu stała viadoma, što prybyćcio Łukašenki ŭ horad nad Sožam admianiajecca. Ludzi žyli čutkami, a ŚMI apieravali insajdami. Adnak u sieradu hradus napružańnia siarod vuličnych rabočych źmienšyŭsia dosyć prykmietna.
U čaćvier 26-ha lipienia niekatoryja ŚMI paviedamili, što pryjezd Łukašenki ŭsio ž čakajecca. Krychu paźniej, pa svaich kanałach, paćvierdzić hetuju infarmacyju ŭdałosia i «Silnym novostiam».
Miascovaja hazieta «Homielskija viedamaści» raskazała (i pakazała), jakuju pryhožuju tratuarnuju plitku vykłali na Savieckaj i jak hetuju ž vulicu i płošču Lenina ŭpryhožyli śviežymi tujami ŭ masiŭnych vazonach.
Darečy, raniej pakładzienuju ŭ mnohich miescach plitku bardovaha koleru kamunalniki ŭ hety dzień badziora farbavali… u bolš bardovy koler.
