Naviednik restaracyi «Pajedziem, pajadzim» na aŭtamabili BMW kala 16-j hadziny ŭčyniŭ najezd na pikietoŭcaŭ, jakija štodnia pratestujuć suprać pracy zabaŭlalnaj ustanovy kala Kurapataŭ. Pra heta karespandentu Svabody raskazaŭ sustaršynia BCHD Pavał Sieviaryniec.
«Spačatku hety kiroŭca, jaho zavuć Uładzimier Č., zmoh zajechać na terytoryju restaracyi, bo pikietoŭcy prosta razyšlisia ŭ baki, ubačyŭšy, ź jakoj chutkaściu jon nabližajecca. Jechaŭ pad 70—80 kilametraŭ i nie tarmaziŭ.
Hetaksama chutka jon potym sprabavaŭ i vyjechać, ale ŭžo ŭrezaŭsia ŭ pikiet, złamaŭšy sabie lusterka. Pikietoŭcy jaho nie prapuskali, jon sčapiŭsia sa Źmitrom Kazakievičam, adbyłasia bojka.
U vyniku ŭ Kazakieviča parvanaja kašula i cialesnyja paškodžańni. Ciapier z hetym kiroŭcam raźbirajucca milicyjanty, prahladajuć videa, a Źmicier Kazakievič pajechaŭ u Baraŭlany pisać zajavu ab napadzie i patrabavać ekspertyzy», — skazaŭ pra incydent Pavał Sieviaryniec, jaki byŭ śviedkam zdareńnia.
Pavodle Paŭła Sieviarynca, z kiroŭcami inšych aŭtamabilaŭ, jakija pryjaždžali 25 lipienia da restaracyi «Pajedziem, pajadzim», u pikietoŭcaŭ kanfliktaŭ nie było.
