U raździele «Žyviolny śviet» na sajcie rajvykankama padrabiazna raśpisana, jakija žyvioły i ŭ jakoj kolkaści pražyvajuć na terytoryi rajona.
Žyviolny śviet rajona pradstaŭleny:
- Łoś — 32
- Kaban — 134
- Kazula — 143
- Zajac — 389
- Babior — 104
- Vydra — 27
- Voŭk — 6
- Cieciaruk — 270
Karystalnik fejsbuka Pavieł Horbač zacikaviŭsia, jakim čynam tak dakładna padličvajuć zajcaŭ dy inšych žyvioł i dasłaŭ zapyt u Drybinski rajvykankam.
Tam patłumačyli svaju mietodyku: «Pry ŭliku vykarystoŭvajucca nastupnyja mietady: zimovy maršrutny ŭlik; ankietny ŭlik; ulik kalavodnych pa pieršym śniezie, ulik babra ŭ pasieliščach, ulik ciecieruka na takach».
Načalnik Maładziečanskaj inśpiekcyi achovy pryrodnych resursaŭ Uładzisłaŭ Čarnoŭ pasprabavaŭ patłumačyć prostymi słovami, jakim čynam jehiery adsočvajuć kolkaść žyvioł:
«Prosta ličyć babroŭ. Jehier viedaje, kolki babroŭ moža žyć u adnoj chatcy, tamu ličyć kolkaść chatak i pamnažaje na kolkaść «žycharoŭ». Kolkaść łasiej ličacca zimoj pa śladach, jakija jany pakidajuć na darožcy da karmuški. Pryblizna takim čynam ličacca ŭsie astatnija žyvioły: składajucca maršruty i karty. Jość jašče taki mietad, jak apytańnie. Jehiery pytajucca ŭ žycharoŭ navakolnych viosak, ci bačyli jany dzikoŭ, kasul i hetak dalej. I taki mietad, jak ni dziŭna, ale źjaŭlajecca adnym z samych dakładnych».
Kolkaść žyvioł padličvajecca raz na hod.
