U čaćvier 21 červienia paśla amal šaścihadovaj rekanstrukcyi adkryvajecca stadyjon «Dynama» — hałoŭnaja spartovaja arena krainy.
Pabudavali na habrejskich mohiłkach
U Minsku XIX stahodździa na miescy pamiž Mahazinnaj i Nižnialachaŭskaj (ciapier heta Kirava i Uljanaŭskaja) znachodzilisia vializnyja habrejskija mohiłki. Miesca dla pachavańniaŭ tam skončyłasia, habrejam adviali novy nadzieł dla pachavańniaŭ na sučasnaj Suchoj. A staryja mohiłki prychodzili ŭ zaniadbańnie.
Pa ŭspaminach vidavočcaŭ, heta było adno z samych niepryvabnych miescaŭ u Minsku.
Balšaviki vyrašyli prablemu pa-svojmu. U 1930-ja na hetym miescy było vyrašana ŭźvieści stadyjon. Pareštki ludziej prosta vyvozili na palihon. A nadmahilnyja plity pajšli na budaŭnictva mnohich minskich budynkaŭ, u tym liku na Dom aficeraŭ.
Sam stadyjon adkryty 12 červienia 1934 hoda. I naležaŭ Usiesajuznamu spartyŭnamu tavarystvu «Dynama».
Budavali supracoŭniki NKVD
Admietna, što budaŭnictvam stadyjona zajmalisia, u tym liku, supracoŭniki NKVD i pahraničniki. Kožny z asabovaha składu musiŭ adpracavać na budaŭnictvie pa 100 hadzin. Tady sam stadyjon znachodziŭsia na miescy, dzie byŭ kaliści rečavy rynak.
Užo na bolš tradycyjnym dla nas miescy «Dynama» pabudavali paśla vajny. Stadyjon byŭ padpaleny ŭžo ŭ pieršyja dni bajavych dziejańniaŭ. Zhareŭ sam stadyjon, a taksama susiednija budynki.
Novuju arenu ŭzvodzili ad 1947 da 1954. Architektaram byŭ Mikałaj Džejmsavič Koli, maskoŭski architektar šatłandskaha pachodžańnia. Druhim architektaram byŭ Michaił Paruśnikaŭ, toj samy, jaki taksama sprajektavaŭ budynki KDB i Nacbanka ŭ Minsku.
Darečy, słavutaja vieža na budynku KDB maje taksama «futbolnaje» pachodžańnie. Isnuje apokryf, što Łaŭrencij Canava prosta chacieŭ hladzieć futbolnyja matčy, nie vychodziačy z budynka.
Prachodziła Alimpijada
Novaje žyćcio «Dynama» nabyło pierad Alimpijadaj 1980 hoda. Niekalki matčaŭ maskoŭskich Hulniaŭ musiŭ pryniać Minsk. Mienavita tady stadyjon umiaščaŭ najbolšuju kolkaść hledačoŭ — 50 tysiač. Sprava ŭ tym, što tady nie było kresłaŭ, a tolki łaŭki.
Tady ž źjaviŭsia i słavuty kazyrok. Chadziła bajka, što architektar uciok u Izrail. Tamu zbudavańnie terminova paŭtorna vypraboŭvali jaho na tryvałaść. Kazyrok vytrymaŭ. Ale paŭnavartasnaj trybunaj tak i nie staŭ. Jaho zakryli dla naviedvalnikaŭ u 1990-ja.
U 1982-m «Dynama» hulała na hetym stadyjonie, kali stanaviłasia čempijonam SSSR pa futbole. Zbornaja Biełarusi pieramahała na «Dynama» hałandcaŭ, a BATE — «Bavaryju». Usie samyja značnyja pośpiechi našaha futboła źviazanyja akurat z hetaj arenaj.
Kali na «Dynama» apošni raz byŭ Łukašenka?
Na adkryćcio navat pryjedzie Alaksandr Łukašenka, jaki nie byŭ na «Dynama» ad 2001 hoda. Tady biełarusy prymali ŭkraincaŭ i realna pretendavali na vychad na čempijanat śvietu. Trenieram našaj zbornaj na toj momant byŭ Eduard Małafiejeŭ. Našy prajhrali ź likam 0:2. Abodva hały zabiŭ lehiendarny bambardzir ukraincaŭ Andrej Šaŭčenka.
Toj matč skončyŭsia vialikim skandałam. Małafiejeŭ vyhnaŭ sa zbornaj tahačasnych lidaraŭ Valancina Bialkieviča i Alaksandra Chackieviča, abvinavaciŭšy ich u zdačy hulni.
A hałoŭnaje, na trybunach masava ŭźniali bieł-čyrvona-biełyja ściahi i skandavali «Žyvie Biełaruś».
Bolej Łukašenka na futboł na «Dynama» nie chadziŭ, jakimi b pryncypovymi ni byli hulni. Nie naviedvaŭ navat pieršyja matčy BATE ŭ Lizie čempijonaŭ, jakija hulalisia akurat na «Dynama», jašče da budaŭnictva «Barysaŭ-Areny».
Što budzie novaha ciapier?
Rekanstrukcyja stadyjona kaštavała 150 miljonaŭ dalaraŭ. Šmat jakija ličby ŭražvajuć. Naprykład, za kabiel zapłacili bolš za 200 tysiač dalaraŭ. Sistema chronamietražu ź fiksacyjaj vynikaŭ abydziecca ŭ 400 tysiač dalaraŭ. Hazon — amal paŭmiljona.
Samaje hałoŭnaje, što pryciahvaje ŭvahu minčukoŭ, — heta novyja elektryčnyja mačty. Ich u narodzie nazvali «muchabojkami». Zrešty, varta pryznać, što ŭnačy jany vyhladajuć fajna.
Chacia chapaje i durnych architekturnych rašeńniaŭ. Naprykład, dacham buduć zakrytyja nie ŭsie trybuny, a tolki try čverci. U vypadku anšłahu, u doždž niekatorym daviadziecca moknuć.
Cikava, jakim budzie los u novaj viersii «Dynama»?
