Pry kancy kastryčnika ŭ siecivie ŭspychnuła čarhovaja virusnaja epidemija. Amal pałova virusaŭ u zaražanych listach była z trajanskimi prahramami, jakija, kali ich zapuścić, nieprychavana ździekujucca z naiŭnych karystalnikaŭ.
Trajan toj dla pryliku chavajecca pad nibyta rolikam z udziełam aktrysy Andželiny Džali. Kamu mała milhacieńnia žonki Breda Pita pa televizary dy ŭ hlancavych časapisach, prapanujecca adkryć rolik z nazvaj anjelina_video.exe. Bolš nieprychavanaj nazvaj dla virusu moža być tolki štoś kštałtu tut_virus.exe.
Kali karystalnik parušyć pieršuju zapaviedź pracy z elektronnaj poštaj (a kali b nie było takich karystalnikaŭ, nie było b hetaj epidemii) i adkryje ekzešny fajł, virus pačnie svajo naśmichańnie.
Pierš-napierš jon pravieryć, ci nie staić užo na kamputary takoha karystalnika jaki-niebudź falšyvy antyvirus. Heta, treba pahadzicca, całkam vierahodna ŭ čałavieka, jaki pstrykaje pa ŭsim, što patrapicca.
Kali taki antyvirus znojdziecca, to trajan supakoicca j zakryjecca.
Kali ž nie, trajan ściahvaje na kamputar sabie ŭ pomač inšych škadlivych paplečnikaŭ, tady vyniščaje svoj zychodny fajł j pierazahružaje systemu.
Pakul juzer-niebaraka siadzić zdranćvieŭšy ŭ čakańni Džali, trajan mianiaje nałady biaśpieki ŭ Windows, adklučaje ŭbudavany brandmaŭer, vyniščaje ŭ rejestry źviestki pašyreńniaŭ Internet Explorer i ci to dla žartu ci to dla maskiroŭki ŭstaloŭvaje pošukavym ruchavikom Google.
Paśla ciškom zahružaje ź sieciva falšyvy antyvirus, a potym ździekam prapanuje karystalniku ŭžo zahružany «antyvirus» zahruzić, bo, maŭlaŭ, kamputar inficyravany. Virus nia manić — ciapier kamputar zaražany, a Džali tak i nie pakazali.
Virusałoŭcy z kampanii «Doktar Veb» dali škadliŭcam tradycyjna hruvastkija nazvy — Trojan.Packed.1198 i Trojan.PWS.Panda.31.
Z kožnaj takoj epidemijaj admysłoŭcy nie stamlajucca (a mo stamlajucca, dy vidu nie padajuć) paŭtarać, što nia varta adkryvać padazronyja listy, a tym bolš adkryvać dačepki da takich listoŭ, a tym bolš dačepki z pašyreńniem exe. Nia ŭsie virusy takija biaschitrasnyja, tamu nie paškodzić taksama mieć sapraŭdny antyvirus dla pošty, abo karystacca paštovymi servisami, jakija majuć dobruju antyvirusnuju i antyspamavuju abaronu.
