U Kijevie skončyŭsia finalny matč futbolnaj Lihi čempijonaŭ. U im madrydski «Reał» pieramoh «Livierpul» ź likam 3:1.
Heta fantastyčnaje dasiahnieńnie — upieršyniu ŭ najnoŭšaj historyi kamanda pieramahła ŭ Lizie čempijonaŭ try razy zapar. Letaś «Reał» vyjhraŭ u turynskaha «Juvientusa», a jašče hod tamu — u madrydskaha «Atletyka».
Pieršy tajm kijeŭskaha matča adznačyŭsia traŭmaj najlepšaha forvarda «Livierpula» Machameda Sałacha. Situacyja atrymałasia nieadnaznačnaj — mnohija ličać, što kapitan «Reała» Sierchia Ramas naŭmysna pavaliŭsia ŭsioj vahoj na ruku supiernika, paškodziŭšy jamu plačo.
Druhi tajm pačaŭsia z hoła napadnika «Reała» Karym Bienziema — heta badaj samaje trahikamičnaje ŭziaćcie varot u finałach Lihi čempijonaŭ.
Bramnik «Livierpula» Łorys Karyus vykinuŭ jamu miač prosta na nahu.
Praź niekalki chvilin Sadyjo Mane zraŭniaŭ lik paśla padačy kutniaha.
A paśla zdaryŭsia jašče bolš cudoŭny hoł. Valijec Haret Bejł, jaki tolki-tolki vyjšaŭ na zamienu, zakinuŭ udaram praź siabie miač prosta ŭ dziaviatku varot «Livierpula».
Skončyłasia ŭsio jašče adnym lapam bramnika «Livierpula». Karyus nie daŭ rady ŭdaru Hareta Bejła ź mietraŭ 30.