Antynarkatyčny art. 328 KK prapanujuć źmiakčyć. U Pałatu pradstaŭnikoŭ 11 maja trapiŭ zakonaprajekt «Ab źmianieńni niekatorych kodeksaŭ Respubliki Biełaruś». Ad parłamientaroŭ Tut.by daviedaŭsia, jakija źmieny prapanujecca ŭnieści ŭ artykuły.
«Maci 328», jakija abjavili haładoŭku, i ich hrupa padtrymki ŭ Administracyi prezidenta. Fota: Vadzim Zamiroŭski, Tut.by.
Jak raspaviali ŭ parłamiencie, u art. 328 KK płanujuć unieści źmieny ŭ płanie terminaŭ pazbaŭleńnia voli, a mienavita
źnizić nižniuju sankcyju pa č. 2 i pa č. 3 artykuła 328 KK — da 3 i 6 hadoŭ adpaviedna, a kanfiskacyju majomaści zamianić na štraf.
Takim čynam, za niezakonnyja z metaj zbytu vyrab, pierapracoŭku, nabyćcio, zachoŭvańnie, pieravozku abo pierasyłku abo niezakonny zbyt narkatyčnych srodkaŭ, psichatropnych rečyvaŭ abo ich prekursoraŭ abo anałahaŭ
prapanujecca karać pazbaŭleńniem voli na termin ad 3 da 8 hadoŭ sa štrafam abo biez štrafu. Siońnia pa hetaj častcy artykuła karajuć pazbaŭleńniem voli na termin ad 5 da 8 hadoŭ z kanfiskacyjaj majomaści abo biez kanfiskacyi.
Za tyja ž dziejańni, učynienyja hrupaj asob, abo słužbovaj asobaj z vykarystańniem svaich słužbovych paŭnamoctvaŭ, albo asobaj, jakaja raniej učyniła złačynstvy, praduhledžanyja artykułami 327, 328, 329 abo 331 KK
płanujuć karać pazbaŭleńniem voli na termin ad 6 da 15 hadoŭ sa štrafam abo biez štrafu. Ciapier karajuć pazbaŭleńniem voli na termin ad 8 da 15 hadoŭ z kanfiskacyjaj majomaści abo biez kanfiskacyi.
U č. 4 i 5 art. 328, a taksama č. 1 i 3 art. 328/1 KK kanfiskacyju majomaści taksama chočuć zamianić na štraf.
