InA «Ukrainskaje fota»
Śviaty sinod kananična niepryznanaj Ukrainskaj pravasłaŭnaj carkvy Kijeŭskaha patryjarchata (UPC KP) abvinavaciŭ Rasiju ŭ sprobach pieraškodzić pracesu atrymańnia aŭtakiefalii — pryznańnia ad Suśvietnaha patryjarchata Kanstancinopala.
«Viadomyja šmatlikija fakty palityčnaha i dziaržaŭnaha ŭmiašańnia z boku Rasijskaj Fiederacyi i prakramloŭskich palityčnych siłaŭ va Ukrainie ŭ praces pryznańnia z metaj pieraškodzić jamu», - havorycca ŭ paviedamleńni, apublikavanym na sajcie UPC KP.
Pavodle infarmacyi kijeŭskaj carkvy, Maskva «praz dypłamatyčnyja i inšyja kanały» akazvaje «cisk» na Kanstancinopalski patryjarchat i inšyja pamiesnyja pravasłaŭnyja carkvy.
U prykład pryvodzicca zbor podpisaŭ suprać atrymańnia ŭkrainskaj carkvoj aŭtakiefalii, jakija, śćviardžaje UPC KP, arhanizavany «prakramloŭskimi palityčnymi strukturami». U pryvatnaści, Ukrainskaja pravasłaŭnaja carkva Maskoŭskaha patryjarchata, jakaja ŭvachodzić u RPC, «vykarystoŭvajučy svoj upłyŭ», raspaŭsiudžvaje «padpisnyja listy» u parafijach patryjarchata va Ukrainie, śćviardžajuć u UPC KP.
U suviazi z hetym UPC KP vykazvaje pratest «suprać umiašańnia Rasii ŭ carkoŭnyja spravy».
Sinod Suśvietnaha patryjarchata ŭ Kanstancinopali užo razhledzieŭ prašeńnie Ukrainy ab pradastaŭleńni aŭtakiefalii i maje namier uzajemadziejničać ź inšymi pravasłaŭnymi cerkvami dla vyrašeńnia hetaha pytańnia. Z prapanovaj nadzialić UPC KP paŭnamoctvy niezaležnaj carkvy vystupiŭ prezident Ukrainy Piatro Parašenka, jaho padtrymała Viarchoŭnaja rada.
U UPC MP zajaŭlali, što Suśvietny patryjarchat adkazny za ahulnapravasłaŭnaje adzinstva i «nie zrobić ničoha takoha, što b hetamu adzinstvu pieraškodziła».
