U školnicy Naści Haŭrylenka padniałasia tempieratura da 39, zatym dziaŭčynka stała kašlać, skardzicca na bol u hrudziach. Jak śćviardžajuć jaje baćki, za hety čas nichto z sanatoryja «Pcič» ź imi nie źviazaŭsia, nie pastaviŭ u viadomaść pra chvarobu Naści, a pozna ŭviečary 2 maja pačuŭsia zvanok ź lakarni Pietrykava: «Dziaŭčynka pamierła». Padrabiaznaści trahiedyi źjavilisia na TUT.BY.
Fota: staronka Naści ŭ «Adnakłaśnikach»
Razmova pra toje, jak Naścia Haŭrylenka z Brahina apynułasia ŭ dziciačym reabilitacyjna-azdaraŭlenčym centry «Pcič», jaje mamie dajecca ź ciažkaściu. Žančyna časta płača, z-za stresu błytaje dni, a paśla taho, jak daviedałasia, što dačka pamierła, kaža, u pamiaci pravał: «Dalej ničoha nie pamiataju».
— Zaraz u našaj Brahinskaj siaredniaj škole idzie ramont, mianiajuć vokny. Horad rychtujuć da «Dažynak», usiudy ŭsio ramantujuć. I dyrektar prapanavaŭ: kab dzieci nie dychali pyłam, davajcie vyvieziem ich u sanatoryj. Ja nie chacieła adpuskać Naściu, prasiła, umolvała: «Dačuška, nie jedź!», ale jaje tudy ciahnuła: maŭlaŭ, usie adnakłaśniki jeduć, — raspaviadaje TUT.BY Nadzieja Haŭrylenka.
20 krasavika dzieci źjechali za 150 kiłamietraŭ ad doma ŭ sanatoryj «Pcič», źmiena pavinna była praciahnucca da 14 traŭnia. Naścia adrazu pa pryjeździe patelefanavała dadomu, skazała mamie, što joj usio padabajecca, choć sanatoryj «nie taki pryhožy, jak u internecie».
— 26 krasavika bližej da viečara patelefanavała dačka: «Matula, u mianie tempieratura 39, schadziła da miedsiastry, jana dała tabletku». Na nastupny dzień užo źjaviŭsia kašal, Naści dali sirop. Heta značyć, dzicia ŭvieś čas chadziła z pakoja ŭ pakoj samo. Heta ŭžo potym u sanatoryi patłumačyli: łazaret raźličany na 6 čałaviek — i jon byŭ pierapoŭnieny, chvoryja dzieci lažali razam sa zdarovymi, — praciahvaje raspaviadać Nadzieja Haŭrylenka. — Tempieratura źbivałasia da 37,6, potym znoŭ padymałasia da 39. Paźniej dačce stała lepš, jana vychodziła na vulicu, a praź niekatory čas stan pahoršyŭsia, Naścia skardziłasia na młosnaść, boli ŭ hrudziach. Joj dali «dźvie čornieńki i adnu žoŭtuju tabletačku», jak ja zrazumieła, aktyvavany vuhal i jašče niešta. Uvieś čas prasiła Naściu dać trubku miedsiastry, kab sama mahła ź joj pierahavaryć, ale dačka bajałasia. Stała šukać telefony sanatoryja, datelefanavacca nie mahła. Ale čamu sa mnoj nichto sam nie źviazaŭsia? Nie skazaŭ, što Naścia zachvareła i jakija preparaty joj dajuć?
Ranicaj 2 maja Naścia apošni raz razmaŭlała z mamaj.
— Jana skazała: «Mamačka, mnie drenna, zabiary mianie dadomu!», ja ŭžo vyjazdžała ŭ sanatoryj. Tryvohu zabiła napiaredadni hetaj razmovy, paviedamiła škole, što zabiraju dzicia, — uzdychaje Nadzieja. — Jašče 1 traŭnia z 10 da 12 viečara my havaryli z Naściaj pa telefonie — jak mnie zdałosia, za hety čas, za dźvie hadziny razmovy, da jaje ŭ pakoj nichto nie zajšoŭ.
«My robim usio mahčymaje, kansultujemsia ź minskimi lekarami»
Kali mama školnicy jechała zabirać jaje z sanatoryja, pačuŭsia zvanok miedsiastry: jana paviedamiła, što dziaŭčyncy zrabili pramyvańnie straŭnika, u jaje ŭpaŭ cisk, u sanatoryj jedzie chutkaja. Siamja raźviarnuła mašynu ŭ bok Pietrykaŭskaj rajonnaj balnicy. Naścia lažała ŭ reanimacyi.
— Ja nie ŭśviedamlała, što adbyvajecca. Tamu, kali vyjšaŭ lekar z adździaleńnia, paprasiła addać mnie dačku: «Vaš dzicia nie transpartabielnaje». Zdymki pakazali: u sercy Naści niejkaja vadkaść, pavialičana ščytapadobnaja załoza i adna nyrka. Jak? My ž usie raniej praviarali, nijakich prablem nie było. Lekary ź Pietrykava, kažuć, telefanavali ŭ balnicy Homiela, chacieli adpravić Naściu tudy, — kaža Nadzieja, mama Naści Haŭrylenka.
Pa słovach lekaraŭ, Naścia ŭ reanimacyi była jašče ŭ śviadomaści, razmaŭlała, ale ŭ toj dzień, 2 maja, baćki nie zmahli ŭbačyć dačku — starońnim uvachod u adździaleńnie zabaronieny. Nadzieja Haŭrylenka pajechała ŭ sanatoryj zabrać rečy Naści, a ŭ 22.00 z Homiela ŭ Pietrykaŭ pavinny byli pryjechać lekary.
— A 10-j viečara patelefanavała ŭ balnicu, tam adkazali: «My robim usio mahčymaje, dzicia ŭviali ŭ son, kansultujemsia ź minskimi lekarami, znajšli najlepšyja preparaty». Za ceły dzień nie zmahli vyvieźci dzicia ŭ Homiel, a tut za 10 chvilin u Pietrykavie znajšli najlepšyja preparaty? A 12-j nočy pačuŭsia zvanok: «Vaša dzicia pamierła ŭ 23.40, prypynieńnie serca», — Nadzieja pačynaje płakać naŭzryd i pryznajecca, što bolš ničoha nie pamiataje.
Dalej usimi pytańniami zajmaŭsia jaje muž Alaksandr. Jak raspaviadaje mužčyna, jon ź pieršych chvilin damahaŭsia taho, kab uskryćcie było nie ŭ Pietrykavie — kab cieła dački nakiravali na sudova-miedycynskuju ekśpiertyzu ŭ Homiel ci Mazyr. U vyniku ekśpiertyza 4 maja prajšła ŭ Homieli.
— U dakumientach paznačana: pryčyna śmierci vyśviatlajecca, zaklučeńnie budzie hatova na praciahu miesiaca. U pietrykaŭskaj balnicy kazali, papiarednie, što heta infiekcyjnaje zachvorvańnie, jakoje kankretna — jany nie zmahli vyznačyć. Chvaroba dała ŭskładnieńnie na ŭvieś arhanizm, tamu i nyrka, i ščytapadobnaja załoza byli pavialičanyja, — robić zdahadku Alaksandr Haŭrylenka. — 5 traŭnia my pachavali dačku. Na maju dumku, supracoŭniki sanatoryja prajavili słužbovuju chałatnaść. Što tyčycca pietrykaŭskich lekaraŭ, mierkavać pakul nie budu, my čakajem zaklučeńnia ekśpiertaŭ. Jano i pakaža, ci zrabili jany ŭsio, što było nieabchodna, ci nie. Mahčyma, doŭha railisia. Ci možna było Naściu adpravić na Homiel, pakul jana jašče była ŭ śviadomaści? Čamu homielskaja bryhada tak doŭha dabirałasia da Pietrykava? Ci mahčyma było zadziejničać viertalot?
«Vypadak uziaty na asabisty kantrol ministra achovy zdaroŭja»
U baćkoŭ Naści ciapier zanadta šmat pytańniaŭ biez adkazu.
— Ja raspaviała pra svajo hora, kab heta bolš ni z kim nie paŭtaryłasia i kab vinavatyja byli pakaranyja. Paśla śmierci Naści baćki inšych dziaciej pajechali ŭ sanatoryj i zabrali ich dadomu, — kaža Nadzieja Haŭrylenka.
U dziciačym reabilitacyjna-azdaraŭlenčym centry «Pcič» ad kamientaroŭ z nahody taho, što adbyłosia, admovilisia.
Dyrektar Brahinskaj siaredniaj škoły Śviatłana Škurko ŭ hutarcy z TUT.BY paćvierdziła infarmacyju, što ciapier u škole idzie «zapłanavany ramont za košt biudžetnych srodkaŭ».
— Na baćkoŭskim schodzie ja prapanavała baćkam 5—7-ch kłasaŭ taki varyjant (pajezdka ŭ sanatoryj. — Zaŭvaha. TUT.BY), kali ich heta zadavolić, nikoha nie prymušała, stanovišča nie nahniatała. Chto chacieŭ, toj pajechaŭ, — kamientuje Śviatłana Škurko. — Adzin raz na hod našy dzieci vyjazdžajuć na azdaraŭleńnie. Sanatoryj «Pcič» vielmi papularny siarod dziaciej, my zaŭsiody śmieła adpraŭlali tudy školnikaŭ, našy vychavalniki byli zadavolenyja arhanizacyjaj adpačynku ŭ hetym sanatoryi.
— Ministerstva achovy zdaroŭja vykazvaje spačuvańnie siamji pamierłaj dziaŭčynki, hety vypadak uziaty na asabisty kantrol ministra, — kamientuje TUT.BY Julija Baradun, pres-sakratar Ministerstva achovy zdaroŭja. — 3 i 4 maja kamisija viedamstva pracavała na miescy zdareńnia ŭ Pietrykavie. Vyniki ekśpiertyzy buduć hatovyja paźniej.
Upraŭleńnie Śledčaha kamiteta pa Homielskaj vobłaści pravodzić pravierku pa fakcie śmierci 11-hadovaj Naści Haŭrylenki.
