Minharvykankam nie daŭ dazvoł na praviadzieńnie ŭ Minsku 9 maja akcyi «Nieśmiarotny połk». Pra heta «Našaj Nivie» paviedamiŭ arhanizatar mierapryjemstva, eks-deputat Pałaty pradstaŭnikoŭ Valeryj Drako.
Uładzimir Pucin biare ŭdzieł u «Nieśmiarotnym pałku». Fota gazeta.ru.
«My šmat pracavali z hetym pytańniem, sioleta čakali kala 5 tysiač udzielnikaŭ. Jašče 4 krasavika my nakiravali prezidentu list: ad hramadskich arhanizacyj, partyj, hienierała Bokava (udzielnik Vialikaj Ajčynnaj).
Adnym z abzacaŭ my napisali: maŭlaŭ, vy lubicie Maskvu, nazyvajecie Pucina bratam. Vyrašyli padyhrać na hetym momancie, ale ni chrana nie atrymałasia. Kali letaś nam adkazvaŭ namieśnik kiraŭnika Administracyi prezidenta, to sioleta adkazaŭ načalnik upraŭleńnia listoŭ i skarhaŭ Šłyk. Apuścili nas nižej niama kudy.
My prapanoŭvali prezidentu ŭznačalić kałonu «Nieśmiarotnaha pałka» jak hałoŭnakamandujučamu, prezidentu. Adkaz pryjšoŭ, što ŭ krainie rychtujecca vosiem akcyj da 9 Maja, budzie respublikanskaja akcyja «Biełaruś pomnić», i akcyja «Nieśmiarotny połk» prosta rastvorycca.
My adreahavali tym, što nakiravali zapyt u Minharvykankam na dazvoł šeścia i mitynhu ad Fiłarmonii. Adkaz pavinien byŭ być 4 maja, ale nie pryjšoŭ. Nakiravali prakuroru Centralnaha rajona na reahavańnie. 5 maja atrymlivajem adkaz, što dva mierapryjemstvy nie mohuć prachodzić u adzin čas. Dazvołu nie dali.
Kali narod pryjdzie — to pojdziem! Kaniečnie, ja pryjdu da Fiłarmonii. Kali ludzi pryjduć, a mianie nie budzie, to heta maja dyskredytacyja. Ja čakaju, što Minharvykankam usio ž adumajecca i daść dazvoł.
Valeryj Drako. Fota sputnik-news.ee.
Vy viedajecie cudoŭna, čamu nie dazvolili, nie budu havaryć. Ja tak miarkuju, što heta rašeńnie prymaŭ asabista hałoŭnakamandujučy. Kali tolki źjaviłasia infarmacyja ab zaklikach pa praviadzieńni «Nieśmiarotnaha pałka», to ŭ toj ža viečar u jaho byŭ staršynia KDB Valer Vakulčyk. I Łukašenka havaryŭ pra Dzień Pieramohi ź im, jon viedaŭ pra heta», — skazaŭ Valeryj Drako.
* * *
Valeryj Drako naradziŭsia ŭ 1946 hodzie. Skončyŭ Minski dziaržaŭny piedahahičny instytut. Pracavaŭ u kiraŭnictvie spravami Savieta ministraŭ. Deputat Viarchoŭnaha Savieta (1995—1996), padčas kanstytucyjnaha kryzisu ŭ listapadzie 1996 hoda padtrymaŭ Łukašenku, staŭ deputatam Pałaty pradstaŭnikoŭ pieršaha sklikańnia.
* * *
«Nieśmiarotny połk» — heta akcyja rasijskaj prapahandy, prymierkavanaja da 9 Maja. U mierapryjemstvach braŭ udzieł asabista Uładzimir Pucin. «Sapraŭdy, «Nieśmiarotny połk» pačaŭsia jak častka ruskaha śvietu, častka Rasii», — skazaŭ deputat Dziaržaŭnaj Dumy Rasii, sustaršynia ruchu «Nieśmiarotny połk» Mikałaj Ziamcoŭ.
Biełaruskija ŭłady ŭsialak sprabujuć minimizavać praviadzieńnie akcyi «Nieśmiarotny połk», zusim nie akcentujučy na joj uvahi.
