Niekalki pradstaŭnikoŭ anarchisckaha ruchu Biełarusi pasprabavali dałučycca da sankcyjanavaj uładami akcyi z nahody 1 traŭnia ŭ Kijeŭskim skvery ŭ Miensku. Ale ŭdzielniki akcyi admovilisia pradstavić im słova.
Anarchisty na čale ź Viačasłavam Kasinieravym pasprabavali vystupić samastojna. Dvoje ź ich byli ŭ maskach. Jany razharnuli raściažku «Svaboda, roŭnaść, samakiravańnie» i pasprabavali vystupić.
Viačasłaŭ Kasinieraŭ pasprabavaŭ raspavieści pra źniavolenaha paplečnika Źmitra Palijenku i pra niemahčymaść damovy z uładami. Adnak udzielniki akcyi ich spynili i pieraškodzili pramaŭlać.
Paśla taho, jak hrupa anarchistaŭ pačała sychodzić z Kijeŭskaha skveru, ich zatrymali ludzi ŭ cyvilnym, pasadzili ŭ sini mikraaŭtobus u źvieźli ŭ nieviadomym napramku. Ahułam zatrymana troje čałaviek.
Mitynh u honar Mižnarodnaha dnia salidarnaści pracoŭnych pravioŭ Biełaruski kanhresa demakratyčnych prafsajuzaŭ (BKDP). Akcyja prajšła ŭ Kijeŭskim skvery, u joj udzielničali kala 100 čałaviek.
Na akcyi prysutničała symbolika BKDP, prafsajuzu REP, Biełaruskaj partyi levych «Spraviadlivy śviet» i niezarehistravanaj partyi BSDP (Narodnaja hramada).
Siarod udzielnikaŭ mitynhu byli kiraŭniki BKDP Alaksandr Jarašuk i prafsajuzu REP Hienadź Fiadynič, namieśnik staršyni Biełaruskaj sacyjał-demakratyčnaj partyi (Hramada) Alaksiej Sihajeŭ, lider «Spraviadlivaha śvietu» Siarhiej Kalakin, sustaršynia niezarehistravanaha Biełaruskaha nacyjanalnaha kanhresu Mikałaj Statkievič.
Za akcyjaj nazirali milicyjanery ŭ cyvilnym, u tym liku kamandzir mienskaha AMAPu Dźmitry Bałaba.