Alaksandr Łukašenka 5 krasavika pravioŭ kadravy dzień. Uznoŭlenaja pasada namieśnika pa ideałohii ŭ Administracyi prezidenta, novych kiraŭnikoŭ atrymali ahienctva BiełTA i Ministerstva lasnoj haspadarki. Raskazvajem pra ich.
Chto taki Uładzimir Žaŭniak?
Infarmacyi pra hetaha čałavieka, jaki ciapier budzie kuryravać ideałohiju i ŚMI, nie tak mnoha. Viadoma, što jon naradziŭsia ŭ Chojnikach u 1968 hodzie, tam hetaje proźvišča nosić bahata chto. Naprykład, načalnik adździeła ŭnutranych spraŭ rajona — Siarhiej Žaŭniak.
Paśla škoły Uładzimir Žaŭniak nakiravaŭsia vučycca ŭ Novasibirskaje vyšejšaje vajskova-palityčnaje ahulnavajskavoje vučylišča pa śpiecyjalnaści «pravaznaŭstva». Vielmi doŭhi čas Žaŭniak słužyŭ u vojsku, spačatku savieckim, potym — biełaruskim.
Tolki ŭ 2002 hodzie pierachodzić na pracu ŭ Nacyjanalny centr zakanadaŭstva i pravavych daśledavańniaŭ. Ad 2008 hoda ŭznačalvaŭ upraŭleńnie zakanadaŭstva ab nacyjanalnaj biaśpiecy. Ad 2014 — namieśnik centra. Nie skazać, kab pasada duža vysokaja, tamu dzivić taki karjerny ŭźlot.
Mahčyma, paraić jaho moh inšy namieśnik staršyni Administracyi prezidenta Valeryj Mickievič, jaki nieadnarazova sustrakaŭsia z Žaŭniakom na roznych pasiadžeńniach i kanfierencyjach.
Žaŭniak maje hanarovuju hramatu ad Nacyjanalnaha schodu za značny asabisty ŭkład u raspracoŭku i ŭdaskanaleńnie narmatyŭnych pravavych aktaŭ u halinie biaśpieki.
Bałatavaŭsia ŭ parłamient, ale nie prajšoŭ
U 2000 hodzie Uładzimir Žaŭniak sprabavaŭ stać deputam Pałaty pradstaŭnikoŭ. Tyja vybary bajkatavała apazicyja. Žaŭniak byŭ kandydatam pa Viciebskaj viaskovaj akruzie №21. Na toj momant jon pracavaŭ načalnikam jurydyčnaj słužby ŭ vajskovaj častcy 52287 u Viciebsku (desantniki).
Siarod siami kandydataŭ, što bałatavalisia pa akruzie, Žaŭniak byŭ samym maładym, — 32 hady. Zrešty, deputatam jamu stać heta nie dazvoliła. U pieršym tury pieramahła namieśnica ministra architektury Taćciana Hołubieva. Na toj čas jana była jašče biespartyjnaj, a paźniej uznačalić praŭładnuju Kamunistyčnuju partyju. Bolej sprobaŭ pajści ŭ palityku Žaŭniak nie rabiŭ.
Admietna, što paźniej Žaŭniak užo sam zajmaŭsia pytańniami vybarčaha zakanadaŭstva, pad jaho kiraŭnictvam prachodzili pracy pa karekciroŭcy i źmienach u «Vybarčy kodeks» u 2016 hodzie.
«Vybarčaje zakanadaŭstva, jak i zakanadaŭstva naohuł, nie źjaŭlajecca statyčnym, jano pavinna hnutka reahavać na suśvietnyja tendencyi, adpaviadać patrabavańniam efiektyŭnaści i praktyčnaj realizacyi», — kazaŭ jon.
Chto takaja Iryna Akułovič?
Novy hienieralny dyrektar BiełTA Iryna Akułovič naradziłasia ŭ 1974 hodzie ŭ Mahilovie ŭ nastaŭnickaj siamji. Kaža, što zaŭsiody viedała, što budzie nastaŭnicaj, ale pierad hetym daviałosia papracavać i na inšych pasadach. Jana była kantraloram «Mahiloŭskaha zavoda bytavych vyrabaŭ». Kali skončyła Mahiloŭski piedahahičny ŭniviersitet imia Kulašova, to stała muzyčnym kiraŭnikom u sadku-jaślach №46, a jašče paźniej nastaŭnicaj małodšych kłasaŭ u škole №21.
«Syšła ŭ dekretny adpačynak. U toj momant maja siabroŭka, jakaja ŭžo pracavała na telebačańni, paraiła pryjści da ich na konkurs. Ja nie była ŭpeŭnienaja ŭ svaich siłach, nie vieryła, što atrymajecca. Dumała, tut niebažychary, a ja niavartaja. Tady na konkurs pryjšło bolš za sto čałaviek. Zapoŭnili ankiety, potym nas vyklikali, z nami hutaryli. Tych, chto prajšoŭ u druhi tur, užo ŭsadžvali pierad kamieraj. Ja vielmi dobra pamiataju, kali mnie pryšpilili mikrafon-piatlicu na levy bok, ja vielmi saromiełasia i bajałasia taho, što budzie čuvać, jak kałocicca serca. Ale akazałasia, usio dobra. Skazali: «Hołas nizki, možna pasprabavać dla radyjo. Chaj pachodzić». Stała prychodzić, zajmacca navinami. I mianie heta adrazu zachapiła. Adrazu zrazumieła, što heta majo», — raskazvała Iryna Akułovič pra svoj prychod u žurnalistyku.
U 2009 hodzie žančyna stała dyrektaram teleradyjokampanii «Mahiloŭ». Pierad hetym jana sprabavała svaje siły jak karespandentka BT u Mahilovie, pisała i ŭ respublikanskija drukavanyja ŚMI.
«Samaje składanaje — nieabchodnaść źmianić harderob. Ja pryvykła da spartyŭnaha stylu adzieńnia. Ale, kali zrazumieła, što treba nasić dziełavy kaścium, heta było sapraŭdy składana. Ja nie mahu ŭvieś čas chadzić u pinžakach», — tak jana kazała pra źmieny ŭ statusie.
Była davieranaj asobaj Łukašenki
U 2013 hodzie była nazvanaja Čałaviekam hoda na Mahiloŭščynie. Na prezidenckich vybarach 2015 hoda Iryna Akułovič była davieranaj asobaj Alaksandra Łukašenki, to bok pravodziła sustrečy, dzie ahitavała ludziej hałasavać za dziejnaha kiraŭnika krainy. Udzielničała ŭ Piatym usiebiełaruskim źjeździe. «Chočacca, kab biełarusy zaŭsiody žyli ŭ mirnaj krainie», — kazała tady jana.
U vieraśni 2016 hoda Iryna Akułovič była pryznačanaja členam Savieta Respubliki. Vystupała adnosna Dekretu №3 ab tak zvanych darmajedach. Kazała, što ŭ im pavinien być indyvidualny padychod.
Ci prysutničała biełaruskaja mova ŭ pracy teleradyjokampanii «Mahiloŭ»? «Naviny ŭ nas vychodziać tolki pa-biełarusku. Vielmi pryhožaja rodnaja mova ŭ prahramie «Słoŭca», u prajektach i siužetach pa historyi i kultury: «Śpiecyjalny repartaž», «Dzieci asfaltu», «Dniami», sieryi intervju «Dazvolcie raskazać», — kazała jana.
Chto taki Vital Drožža?
Novym ministram lasnoj haspadarki staŭ 40-hadovy Vital Drožža, jaki da hetaha času ŭznačalvaŭ nacyjanalny park «Brasłaŭskija aziory». Rodam mužčyna z Kareličaŭ, ale ros u Łahojsku. Jaho mama, Ała Drožža, bolš za 20 hadoŭ adpracavała ŭ struktury Minabłvykankama.
Pracoŭnuju dziejnaść Vital Drožža pačynaŭ u Łahojskim lashasie na pasadzie rabočaha. Potym na nievialiki čas syšoŭ u strukturu MUS, ale praca ŭ milicyi nie duža pajšła, i ŭžo praz hod viarnuŭsia ŭ les. Kiravaŭ Babrujskim lashasam. A ŭ 2013-m pryznačany dyrektaram u «Brasłaŭski aziory».
Vital Drožža žanaty, jahonaja žonka Alena ŭ 2017 skončyła Univiersitet fizičnaj kultury. U pary hadujecca dačka Alaksandra i syn Kirył.
Sam Vital Drožža ŭ supołcy Ukantakcie padpisany na patryjatyčny pablik «Maja kraina Biełaruś», u sacsietkach jon u asnoŭnym pościć fota zdabytych na palavańni trafiejaŭ.
