Časopis «Śpiecnaz» cytuje słovy byłoha kiraŭnika čaści ŭnutranych vojskaŭ 3214 Dźmitryja Paŭličenki.
U pryvatnaści, toj raskazaŭ pra rotu vyviedki, stvoranuju ŭ 1998 hodzie.
Taja rota, pa słovach Paŭličenki, u tym liku «zajmałasia likvidacyjaj baz Rasijskaha nacyjanalnaha adzinstva (RNIE), «Biełaha Lehijona» i Biełaruskaj partyi svabody.
«Ekstremisty, jakija sprabavali destabilizavać situacyju ŭ krainie, stvarali letniki, dzie vučyli moładź sposabam supraćstajańnia supracoŭnikam milicyi, rychtavali da napadu na pravaachoŭnikaŭ», — dadaŭ Paŭličenka.
«Naša Niva» pacikaviłasia ŭ byłoha kiraŭnika «Biełaha Lehijona» Siarhieja Čysłava (ciapier źmianiŭ proźvišča na Bulbu), nakolki blizkija da praŭdy słovy Paŭličenki.
«Nivodnaj našaj «bazy» bajcy Paŭličenki nie likvidavali, niešta pałkoŭnik błytaje, — adkazaŭ Čysłaŭ. — Što ličyć «bazaj»? Niejki stacyjanarny łahier? Takoha ŭ nas nikoli nie było. Byvała, što my pravodzili letniki, ale pry hetym brali aficyjny dazvoł u laśnictvaŭ ci miascovych uładaŭ. Tajemnaści nie było».
«I nie viedaju, jak nakont astatnich pieraličanych u śpisie «ekstremistaŭ, jakija sprabavali destabilizavać situacyju ŭ krainie», ale «Bieły Lehijon» adnosiŭ siabie da patryjotaŭ-dziaržaŭnikaŭ. My, naadvarot, dapamahali čym mahli dziaržaŭnym orhanam: naprykład, davodzili da viedama taho ž Paŭličenki i jahonaha kiraŭnictva fakty antydziaržaŭnaj dziejnaści RNIE. U pryvatnaści, papiaredžvali pra dziejańni byłoha bajca «Ałmaza» Valeryja Ihnatoviča, jaki na bazie RNIE padbiraŭ i rychtavaŭ bajevikoŭ dla likvidacyi biełaruskaj apazicyi. Papiaredžvali taksama pra štohadovy letnik RNIE, jaki pravodziŭsia la voziera Sialava pad Barysavam. Ale ni Paŭličenka, ni jahonyja raźviedčyki nijakich mier nie pryniali. Chacia, byŭšy papiaredžanymi, jany b mahli praduchilić tyja zabojstvy, što ździejśniŭ Ihnatovič»,— adznačyŭ Čysłaŭ i nahadaŭ, što ŭ Asacyjacyi krapavikaŭ byli siabry «Biełaha Lehijona».
«Na zdaču na naš «Stalovy bieret» pryjazdžali instruktarami krapaviki. I raniej my da ich na zdaču na krapavy jeździli ŭ Vałoŭščynu. My zaŭždy ličyli i ličym, što pahony nie zaminajuć lubić Biełaruś. Prykra, što Paŭličenka ŭ niejkich ułasnych metach sprabuje palić brudam «Bieły Lehijon», — padsumavaŭ Čysłaŭ.
***
Dźmitryju Paŭličenku zabaronieny ŭjezd u krainy Jeŭrasajuza za mierkavanuju datyčnaść da «eskadronu śmierci» — hrupoŭki, jakaja, jak miarkujecca, zajmałasia vykradańniem i zabojstvam apazicyjnych palitykaŭ, biznesoŭcaŭ, a taksama pradstaŭnikoŭ kryminalitetu.
