Były pałac Radziviłaŭ u vioscy Pałaniečka Baranavickaha rajona vystaŭleny na prodaž sa źnižeńniem ceny na 80%, paviedamlaje BiełTA. Paŭtorny adkryty aŭkcyjon pa prodažy historyka-kulturnaj kaštoŭnaści pryznačany na 29 maja.
Pačatkovy košt prodažu składaje 19 210 rubloŭ. Ziamielny ŭčastak płoščaj 3,3 ha pradastaŭlajecca ŭ arendu terminam na 50 hadoŭ. Pa ŭmovach prodažu novy ŭłaśnik abaviazany budzie pravieści rekanstrukcyju (restaŭracyju) abjekta ŭ abumoŭlenyja terminy, padpisać i zarehistravać u Ministerstvie kultury achoŭnaje abaviazacielstva i vykarystoŭvać abjekt na praciahu troch hadoŭ z momantu ŭvodu ŭ ekspłuatacyju.
Budynak byłoha pałaca Radziviłaŭ vystaŭlajecca na tarhi sa źnižeńniem ceny na 80% u čaćviorty raz. U cełym ža Baranavicki rajvykankam sprabuje pradać abjekt z 2013 hoda. Za hety čas jaho košt źniziŭsia praktyčna ŭ šeść razoŭ.
Pałac u vioscy Pałaniečka źjaŭlajecca pomnikam architektury kłasicyzmu. Jon byŭ pabudavany ŭ druhoj pałovie XVIII stahodździa pa zahadzie Macieja Radziviła jak kopija italjanskaj viły Tryvułzina. Naščadki Radziviłaŭ žyli ŭ Pałaniečcy da 1939 hoda. Paśla vajny ŭ pałacy raźmiaščałasia škoła-internat. Z 1999 hoda jon pustuje.
