Heta pieršy vypadak u Homielskaj vobłaści. Niebiaśpiečnaje infiekcyjnaje zachvorvańnie vyjaŭlena ŭ 35-hadovaha žychara Žłobina, jaki viarnuŭsia dniami z Adesy.
Chvory znachodzicca pad nahladam lekaraŭ u Homielskaj infiekcyjnaj balnicy, paviedamili tut.by u Žłobinskaj CRB. Jaho stan aceńvajecca jak stabilny. Žyćciu chvaroba nie pahražaje.
Pravodzicca miedycynskaje nazirańnie za ludźmi, kantaktavali z chvorymi. Na siońniašni dzień usie jany zdarovyja.
Pieršyja vypadki adru byli zafiksavanyja ŭ Vaŭkavysku ŭ kancy lutaha.
Na 15 sakavika, pa dadzienych Ministerstva achovy zdaroŭja, było łabaratorna paćvierdžana 24 vypadki adru.
Jak paviedamili miedyki, zachvorvańnie ŭ bolšaści vypadkaŭ vyjavili ŭ tych, chto nie byŭ pryščepleny.
Nahadajem, u kancy minułaha hoda i pačatku hetaha ŭspyška adru była va Ukrainie i Jeŭropie. Miedyki źviazvajuć ich ź nizkim achopam prafiłaktyčnymi pryščepkami. U Ministerstvie achovy zdaroŭja prasili biełarusaŭ, jakija płanujuć jechać u Jeŭropu ci Ukrainu, udakładnić u paliklinikach, ci rabili im pryščepki ad hetaha zachvorvańnia.
Nacyjanalny kalandar praduhledžvaje prafiłaktyčnyja pryščepki ad adru ŭ 1 hod i ŭ 6 hadoŭ. Abaronu zabiaśpiečvajuć mienavita dźvie pryščepki. Kali źviestak ab pryščepkach niama abo viadoma tolki pra adnu, tady varta zrabić pryščepku navat darosłamu nie paźniej jak za miesiac da pajezdki.
Miedyki rajać nieadkładna źviartacca da lekara, kali paśla viartańnia z-za miažy pavysiłasia tempieratura, źjavilisia syp, boli ŭ horle, kašal, zapaleńnie ślizistaj vačej. Padčas kansultacyi treba skazać lekaru, što niadaŭna viarnulisia ź inšaj krainy.
