Z nabližeńniem Dnia Voli niekatoryja rasijskija ŚMI praciahvajuć rabić publikacyi na temu Biełaruskaj Narodnaj Respubliki i jaje roli ŭ historyi. «Naša Niva» praciahvaje znajomić vas z materyjałami ŭ rasijskich ŚMI na hetu temu.
U internet-vydańni «Siehodnia.ru» źjaviŭsia materyjał «Iudaŭ hrech BNR», u jakim aŭtar z čarnasociennych i impierskich pazicyj pradstaŭlaje historyju Biełaruskaj Narodnaj Respubliki.
Na dumku hetaha vydańnia, mienavita zachodnija historyki akcentujuć uvahu na abviaščeńni niezaležnaści BNR, chacia sama hetaja padzieja nibyta nie vartaja ŭvahi, pišuć čarnasociency.
«Siehodnia.ru» piša, što ŭ toj čas na askiepkach byłoj Rasijskaj Impieryi było šmat novych dziaržaŭnych utvareńniaŭ (siarod ich i BNR), jakija tolki i rabili, što «zazirali niemcam u rot».
Dalej aŭtar krytykuje deputata Ihara Marzaluka za jaho cytatu «BNR — heta biełaruski palityčny prajekt… Heta nie niamiecki prajekt».
«Niaŭžo jon vieryć, byccam niemcy na padkantrolnaj im terytoryi dazvolili kupcy prajdziśvietaŭ stvarać niejkija samaścijnyja respubliki? Nie vieryć, viadoma. Prosta chłusić»,
— piša «Siehodnia.ru».
Aŭtar miarkuje, što BNR mahła isnavać tolki va ŭmovach niamieckaj akupacyi:
«Hiermanija vajnu prajhrała. Piesienka BNR była śpieta. I zaraz, siedziačy ŭ Varšavie, hrupka zachodnich historykaŭ-prapahandystaŭ sprabuje razduć sumnuju historyju BNR da fantastyčnych pamieraŭ. I sprabuje napałochać ciapierašnich biełarusaŭ — BNR była časovaj formaj dziaržaŭnaści, hladzicie, jak by i sučasnaja Biełaruś nie raźvitałasia sa svajoj niezaležnaściu».
Šanavańnie BNR aŭtar-čarnasocieniec nazyvaje zdradaj i poŭzańniem na karačkach pierad Zachadam:
«Iudaŭ hrech kałabaracyjanizmu vydajuć za hanarovy ŭčynak. Prapahandysckija viačorki ŭ Varšavie zadumany dla taho, kab atručvać śviadomaść maładych biełarusaŭ nacyjanalistyčnaj prapahandaj, prymusić ich adračysia ad ahulnaj histaryčnaj pamiaci, dzie vialikarosy i biełarusy razam vajavali suprać hiermanskich i polskich akupantaŭ. Zmahalisia razam, tamu što i tyja, i inšyja - ruskija!»
Na sajcie rus-bel.online, jaki pazicyjanuje siabie jak «biełaruska-rasijskaje infarmacyjnaje ahienctva», vyjšaŭ bolš niejtralny materyjał «100 hadoŭ BNR: chto ž naščadak?». U im krytykujecca nie BNR, abvieščanaja ŭ 1918 hodzie, a sučasnaja Rada BNR, jakaja, na dumku rus-bel.online, składajecca z kałabaracyjanistaŭ i samazvancaŭ:
«Nažal, ciapier ideju BNR časta ekspłuatujuć siły, jakija padzialajuć vielmi sumnieŭnyja pohlady. Jakija dachodziać da pramoha admaŭleńnia biełaruskaj dziaržaŭnaści i navat adkrytaj padtrymki kałabaracyjanistaŭ i zabojcaŭ biełarusaŭ z palicajaŭ pry nacysckich akupantach».
