Usie mabilnyja telefony kampanii Xiaomi pracujuć na apieracyjnaj sistemie Android, vykarystoŭvajučy firmovuju abałonku MIUI — mocna pierapracavanuju viersiju karystalnickaha asiarodździa, što najbolš adlustroŭvajecca na dyzajnie sistemy i niekatorych pryncypach kiravańnia pryładaj.
Doŭhi čas MIUI nie mieła biełaruskamoŭnaha interfiejsu. U pačatku 2018 hoda «Našaj Nivie» stała viadoma, što hrupa entuzijastaŭ jakraz zajmajecca pierakładam, kab vyrašyć hetuju prablemu.
Minski prahramist Maksim Jakuškin, adzin z udzielnikaŭ pierakładu, raspavioŭ nam tady, što paśla Novaha hodu praces mocna zamarudziŭsia.
Maksim Jakuškin.
«Uvohule ŭ jakaści pierakładčykaŭ zarehistravalisia kala 15 čałaviek. Ale prablema ŭ tym, što ź ich aktyŭna pierakładajuć tolki 2—3 čałavieki, — kazaŭ Maksim. — Naš prahres za tyja dva miesiacy, jak ja dałučyŭsia, padros na 22% i ciapier składaje kala 50%. Ale na čas kaladnych śviataŭ praca nad pierakładam krychu prypyniłasia, i mnie sumna, što praces ruchajecca tak pavolna».
U svaim materyjale my raspaviali, jakim čynam možna dapamahčy prajektu, i, jak kaža Maksim, ciaham nastupnych niekalkich dzion źjaviłasia šmat novych aktyvistaŭ, i pierakład paskakaŭ.
Prajšło krychu bolš za dva miesiacy. Z nami źviazaŭsia Maksim Jakuškin i paviedamiŭ, što dla smartfonaŭ Xiaomi, jakija pracujuć na AS Anroid 7 i Android 8, źjaviłasia biełaruskaja mova (u prašyŭkach MIUI viersii 8.3.8 i 8.3.15, jakija vyjšli 09 i 16 sakavika adpaviedna).
Jaje ciapier padtrymlivaje interfiejs, a voś ubudavanyja dadatki — pakul nie. Dapamahčy praciahnuć biełarusizacyju MIUI mohuć usie achvotnyja tut. Svajho pierakładu čakajuć jašče bolš za 40 tysiač fraz.
Aktyvisty zajmalisia hetaj spravaj absalutna biaspłatna, u volny čas. Tamu dla ich stała niečakanaściu navina, što kampanija abrała 50 pierakładčykaŭ na roznyja movy z usiaho śvietu, jakija pierakłali bolš za ŭsio fraz, i ŭznaharodziła ich kaštoŭnymi padarunkami. Tak, biełarus Alaksandr Novikaŭ zaniaŭ druhoje miesca (pierakłaŭ bolš za 50 tysiač fraz), a Źmicier Horbač i Maksim Jakuškin padzialili treciaje (kožny pierakłaŭ ad 9 da 45 tysiač fraz).
