2 śniežnia 2017 hoda hruzavik «ZIŁ» prataraniŭ ludziej na piešachodnym pierachodzie la handlovaha centra «Zamak» na minskim praśpiekcie Pieramožcaŭ. Za styrnom byŭ ćviarozy 55-hadovy mužčyna. Ale hruzavik pajechaŭ na zialonaje śviatło.
U vyniku avaryi dziaŭčynka, 2006 hoda naradžeńnia, pamierła na miescy zdareńnia. Jaje babuli, 1961 hoda naradžeńnia, bratu, 2010 hoda naradžeńnia, i jašče dvum piešachodam pryčynieny roznyja cialesnyja paškodžańni.
Paśla DTZ ułady navat prybrali toj piešachodny pierachod.
Ciapier śledstva pa spravie skončyłasia, paviedamlaje hałoŭnaje ŭpraŭleńnie SK.
Pa infarmacyi śledčych techahlad aŭtamabila nie pravodziŭsia z 2015 hoda, a ŭ žniŭni 2017 hoda kiroŭca pryciahvaŭsia da administracyjnaj adkaznaści za kiravańnie transpartnym srodkam, jaki nie prajšoŭ dziaržtechahlad.
Ekśpiertyzy pakazali, što mašynu nielha było dapuskać da ruchu: tarmaznaja sistema, rulavoje kiravańnie i chadavaja častka hruzavika byli niaspraŭnyja. U tym liku na adnym z kołaŭ u pracesie ekspłuatacyi aŭtamabila była całkam znošanaja tarmaznaja nakładka.
«Taksama śledstvam ustanoŭlena, što kiroŭca bačyŭ zabaranialny sihnał śviatłafora i mieŭ mahčymaść spynić aŭtamabil pierad stop-linijaj tolki pry ŭmovie spraŭnaści tarmazoŭ. Akramia taho, u kiroŭcy była mahčymaść advieści transpartny srodak ad piešachodnaha pierachodu, vyjechaŭšy na hazon abo aharodžu, što dapamahło b praduchilić trahiedyju», — paviedamlaje Śledčy kamitet.
Kryminalnaja sprava nakiravanaja ŭ sud. Abvinavačany — toj samy kiroŭca — pryznaŭ vinu. Jamu pahražaje da 5 hadoŭ pazbaŭleńnia voli.
