Ilustracyjny malunak.
Pieršyja supraćzačatkavyja tabletki, jakija padaŭlajuć avulacyju ŭ žančyn, źjavilisia ŭ kancy 1950-ch. Ciapier ich rehularna prymajuć amal 100 miljonaŭ čałaviek.
Adnak navukoŭcy da hetaha času nie stvaryli takija ž tabletki dla mužčyn. Tyja, što ŭžo raspracavanyja, abo nie dajuć harantavanaha vyniku, abo vyklikajuć istotnyja pabočnyja efiekty, jakija nie dazvalajuć prymać ich pastajanna. Akramia taho, bolšaść ź ich vyklikaje prablemy z erekcyjaj i surjoznyja parušeńni psichiki, tamu ni adzin preparat tak i nie atrymaŭ aficyjnaha ŭchvaleńnia.
Stefanija Pejdž z Univiersiteta Vašynhtona i jaje kalehi ŭžo niekalki hadoŭ pracujuć nad stvareńniem supraćzačatkavych srodkaŭ na asnovie dvuch mužčynskich harmonaŭ — testasteronu i prahiesteronu. Hetaje rečyva, jak tłumačać navukoŭcy, prymušaje pałavyja kletki ŭ siamieńnikach prypynić cykł razmnažeńnia, što pryvodzić da pastupovaha źniknieńnia darosłych śpiermatazoidaŭ.
Pracu tabletak navukoŭcy pravieryli na hrupie sa sta dobraachvotnikaŭ, jakija pavinny byli prymać rečyva kožny dzień u troch roznych dozach i paviedamlać pra źmieny ŭ samaadčuvańni. Častka mužčyn prymała nie realny preparat, a pustyšku, ale pra heta jany daviedalisia tolki paśla zaviaršeńnia ekśpierymientu.
Jak pakazała daśledavańnie, vialikija dozy preparata efiektyŭna padaŭlali razmnažeńnie śpiermatazoidaŭ, ale nie pieraškadžali pracy pałavych orhanaŭ i nie vyklikali inšych prablem sa zdaroŭjem. Adzinym niehatyŭnym efiektam stała toje, što ŭdzielniki ekśpierymientu nabrali lišniuju vahu i ŭ ich pavysiŭsia ŭzrovień chalesterynu.
Zaraz navukoŭcy pravodziać bolš maštabnyja ekśpierymienty, padčas jakich niekalki sotniaŭ mužčyn buduć prymać tabletki na praciahu čatyroch i bolš hadoŭ.
