54-hadovy žychar Minska Ihar Chlaba, naziralnik na vybarach, źviarnuŭ uvahu na pavodziny staršyni kamisii na ŭčastku №64 Frunzienskaha rajona Minska, jaki znachodziŭsia ŭ škole №185.
Staršynia kamisii — dyrektarka škoły №185 Halina Jurcevič — admaŭlałasia razumieć biełaruskuju movu: nie razumieła, što napisana ŭ pratakole-nakiravańni, nie ŭsprymała vusnuju havorku.
Ci moža być takoje ŭ sučasnaj Biełarusi? «Naša Niva» patelefanavała ŭ hetuju škołu, kab spytać Halinu Jurcevič asabista.
Halina Ivanaŭna Jurcevič.
Dyrektarka spačatku skiravała nas z usimi pytańniami da vybarčaj kamisii, miarkujučy, što tam buduć u kursie pra ŭzrovień vałodańnia biełaruskaj samoj Jurcevič. Tamu my pierapytali jašče raz.
«A dzie napisana, što dyrektarka škoły pavinna biełaruskuju movu razumieć? Ja nie viedaju, što takoje «dyrektarka», da pabačeńnia», — skazała žančyna i spyniła razmovu.
Jurcevič vykładaje ŭ škole «Asnovy biaśpieki žyćciadziejnaści» i hramadaznaŭstva. Ci dapuščalna nastaŭnikam nie viedać biełaruskuju movu, pracujučy ŭ škole, dy jašče i dyrektaram?
My adrasavali hetaje pytańnie ŭ pres-słužbu Minadukacyi.
«Kaniečnie, dakumienta, jaki b prapisvaŭ, kolki movaŭ musić viedać dyrektar, niama. Ale luby piśmienny čałaviek pavinien viedać niekalki movaŭ, asabliva svaju. I my heta daniasiom, jana nie pavinna była tak vykazvacca», — adkazała pres-sakratarka viedamstva Ludmiła Vysockaja.