U ramkach pres-kanfierencyi da «stahadovaha jubileju Uzbrojenych sił Biełarusi» ministr abarony Andrej Raŭkoŭ raskazaŭ pra toje, kudy ruchajecca biełaruskaje vojska.
Raŭkoŭ nazvaŭ asnoŭnaj zadačaj — stvareńnie kampaktnaha i mabilnaha vojska da 2020 hoda. U pryvatnaści, uchił budzie rabicca na zdolnaść supraćdziejańnia hibrydnym vyklikam, na raźvićcio infarmacyjnaha supraćstajańnia, a taksama na ŭmacavańni sił śpiecyjalnych apieracyj i ŭdaskanaleńni sistemy terytaryjalnaj abarony.
«Pravodzicca aptymizacyja i pieraŭzbrajeńnie. Z ulikam metavaha pieraŭzbrajeńnia płanujecca davieści dolu sučasnych uzbrajeńniaŭ u vojsku da 50%», — skazaŭ Raŭkoŭ.
Ministr paviedamiŭ, što płanujecca zakupić i raźmiaścić pad Astraŭcom batareju TOR M-2. Razam z tym jon źviarnuŭ uvahu, što Rasija pakul nie moža pastavić Biełarusi samaloty Su-30, bo nie moža ich vyrabić — niekatoryja detali trapili pad zachodniaje embarha.
Raŭkoŭ nazvaŭ važnym pavieličeńnie kolkaści bajavoha kampanientu i zdolnaści čaściej da aŭtanomnych dziejańniaŭ.
Ministr paviedamiŭ pra pastrožvańnie adboru pryzyŭnikoŭ na ŭzroŭni vajenkamataŭ i kamplektacyju čaściej sistemami videanazirańnia. «Ale i kamiery — heta nie panaceja, samaje važnaje — vychavańnie», — skazaŭ jon.
A voś smartfony ŭ vojsku nie dazvolać, bo ich techničnyja mahčymaści stvarajuć pahrozu biaśpiecy.
Razam z hetym Raŭkoŭ raskazaŭ, što była praviedziena šyrokaja pravierka ŭsich vajennych čaściej, bolš za 100 čałaviek u 2017 hodzie zvolnieny z vojska praź psichičnyja prablemy.
Zakranuŭ ministr i temu Danbasa:
«U štacie 103-j bryhady my majem miratvorčuju rotu. Skład — 100 čałaviek, 50 ź jakich u stałym składzie, 50 — u pieramiennym. Jany vyvučajuć anhlijskuju movu, prachodziać navučańnie ŭ roznych dziaržavach i mohuć vykonvać zadačy ŭ lubym rehijonie śvietu. Ale tut treba niekalki abaviazkovych umovaŭ, kab pajechać u Danbas: rašeńnie Rady biaśpieki AAN, zhoda krainy, kudy ŭvodziać vojski, a z našaha boku — rašeńnie kiraŭnika dziaržavy. I kožny čałaviek, jaki jedzie, pavinien zhodu svaju vykazać», — skazaŭ jon.
Raŭkoŭ prakamientavaŭ i słovy Alaksandra Łukašenki pra toje, što ŭ vojska nie varta zabirać chłopcaŭ, kali jany — adzinyja dzieci ŭ siemjach:
«Heta było nie ŭkazańnie, a dumka, vykazanaja ŭsłych. U nas kožny piaty chłopiec — adzin u siamji. Treba kanstruktyŭna padychodzić da hetaha pytańnia», — skazaŭ jon.
Kali hienierały ŭ nas zahavorać pa-biełarusku?
«A heta treba? Prychodziać da mianie maładyja ludzi i sprabujuć razmaŭlać pa-biełarusku. Ale ž zaŭvažny akcent, — narakaje Raŭkoŭ. — Kali havaryć, to litaraturna, a nie tolki kab pakazać, što ja pa-biełarusku razmaŭlaju».
