Sajt National Geographic apublikavaŭ ekskluziŭnaje videa, na jakim kiraŭnik SpaceX Iłan Mask razam z astatnimi supracoŭnikami kampanii naziraje za startam rakiety-nośbita Falcon Heavy — samaj mahutnaj z rakiet, jakija ekspłuatujucca ciapier, pieradaje newsru.com.
«Śviaty latučy ***, hetaja štuka ŭźlacieła!» — usklikaje Mask, nazirajučy za tranślacyjaj zapusku na ekranie ŭ centry kiravańnia. Potym jon vybiahaje na vulicu, kab nazirać za paśpiachovym uźlotam unikalnaj rakiety, zdolnaj padniać u kosmas 63,4 tony hruzu, što roŭna vazie dvuch darosłych kašałotaŭ, adznačaje National Geographic.
Jak paźniej pryznavaŭsia Mask, ni da, ni adrazu paśla zapusku jon nie byŭ upeŭnieny ŭ jaho pośpiechu.
Histaryčny pusk adbyŭsia 6 lutaha ź placoŭki LC-39A Kaśmičnaha centra Kienedzi na mysie Kanavierał u Fłorydzie. Zapusk prajšoŭ paśpiachova, choć nie abyšłosia bieź niepryjemnaściaŭ pry pasadcy na vadu centralnaha razhonnaha błoka. Ale ŭdałosia zachavać dva dadatkovyja paskaralniki, jakija ździejśnili paśpiachovuju pasadku na naziemnych płatformach.
7 lutaha Mask paviedamiŭ, što rakieta vyjšła za miežy arbity Ziamli i ruchajecca ŭ bok pojasa asteroidaŭ. Pry hetym, miarkujučy pa apublikavanaj Maskam schiemie, rakieta adlacić ad Sonca dalej, čym čakałasia, i amal dasiahnie arbity karlikavaj płaniety Cerera.
Pavodle raźlikaŭ, kali ŭ vyniku rakieta vyjdzie na pravilnuju arbitu, to dzieści ŭ kastryčniku jana tearetyčna moža dasiahnuć Marsa. Ale heta budzie vypadkovaść, bo techničnyja dadzienyja razhaniajučaha błoka Falcon Heavy nie praduhledžvajuć mahčymaści vypraŭleńnia trajektoryi ruchu, adznačaje Live Science.
