Pavodle prezydenta Polščy Dudy, Tarasevič ŭznaharodžany za «adčuvańnie kantekstu času i miesca ŭ spałučeńni sa śćvierdžańniem biełaruskaj nacyjanalnaj identyčnaści». Pra heta piša Radyjo Svaboda sa spasyłkaj na sajt dzieje.pl.
Kamitet premii pad kiraŭnictvam prafesara Andžeja Ratermunda zajavaiŭ, što Lavon Tarasevič ŭznaharodžvajecca «za ŭpartaje prasoŭvańnie i abaronu kaštoŭnaściaŭ śvietu, adnym ź dziejačoŭ jakoha jon siabie adčuvaje i jakoha ŭ značnaj miery ŭžo niama».
«Aproč žyvapisu, druhim sensam jaho žyćcia źjaŭlajecca zachavańnie i raźvićcio kulturnaj samabytnaści biełarusaŭ u Polščy. Hetaja hramadzkaja dziejnaść vyklikaje sympatyi… Lavon Tarasevič buduje tryvałyja masty ŭzajemarazumieńnia dla abarony ahulnaj polska-biełaruskaj spadčyny», — skazaŭ staršynia kamitetu premii.
Padčas cyrymonii ŭznaharodžvańnia ŭ Karaleŭskim zamku ŭ Varšavie byŭ začytany list ad prezydenta Polščy Andžeja Dudy. Prezydent vykazaŭ radaść, što da šmatlikich uznaharod i tytułaŭ Lavona Taraseviča za jahonuju tvorčaść, a taksmama hramadzkuju i kulturnuju dziejnaść ciapier dadałasia jašče adna, jakoj ŭznaharodžvajucca asoby, jakija spryčynilisia da zachavańnia i abarony polskaj kultury.
Premija imia prafesara Hiejštara ŭručajecca fondam Kronenberha ad 1999 hodu. Siarod jaje laŭreataŭ Elžbieta i Kšyštaf Pendereckija, Andžej Vajda i Norman Dejvis.
