Staličnyja padatkaviki kanfiskavali ŭ handlara-nielehała bolš za 100 kh sała, paviedamiła ahienctva «Minsk-Naviny» sa spasyłkaj na inśpiekcyju MPZ Respubliki Biełaruś pa horadzie Minsku.
Pavodle słovaŭ śpiecyjalistaŭ, mužčyna, jaki realizoŭvaŭ sała z mašyny, byŭ zaŭvažany ŭ Frunzienskim rajonie na vuł. Dunina-Marcinkieviča.
U vyniku kantrolnaha mierapryjemstva pradstaŭniki padatkovaj słužby ŭstanavili: mužčyna realizuje ź mikraaŭtobusa salonaje i vendžanaje sała, a taksama hrudzinku. Była praviedziena kantrolnaja zakupka.
Padčas razboru vyśvietliłasia, što mužčyna sprabuje zarabić na chleb nadzionny, nie majučy dziaržrehistracyi. U 2017 h. mužčyna ŭžo atrymlivaŭ papiaredžańnie za anałahičnaje parušeńnie. Na toj momant štraf za nielehalny handal i bolš žorstkija sankcyi nie ŭžyvalisia.
«U hety raz hramadzianin pasprabavaŭ pradjavić daviedku ź sielsavieta ab tym, što sała — pradukcyja, atrymanaja z asabistaha padvorka. Adnak dakumient vyklikaŭ sumnievy. Paśla zapytu ŭ sielsaviet vyśvietliłasia: daviedka za adpaviednym numaram sapraŭdy vydavałasia, ale na pradukcyju raślinnaha pachodžańnia (truskaŭki). A na pravijant nakštałt sała dakumient u dadzienym rajonie vydać nie mahli, tamu što tam dziejničała zabarona (karancin) na ŭtrymańnie śviniej na pryvatnych padvorkach», — udakładnili ŭ padatkovaj.
U dačynieńni da mužčyny skłali pratakoł i nakłali aryšt na aŭtamabil koštam 5 000 rubloŭ. Akramia taho, u pradaŭca kanfiskavali bolš za 100 kh pradukcyi na sumu 1 346 rub.
