Kali ja čuju «biełaruski čynoŭnik» — adrazu pačynaju lubić. Navat jašče nie viedaju, što i kaho, ale lubić pačynaju adrazu. Za ščyraść. Za paśladoŭnaść. Za pradkazalnaść.
Heta pad nazvaj «biełaruski apazicyjanier» moža chavacca što zaŭhodna. Kamunist, anarchist, śfieryčny lićvin, śviaty albo hrešnik, vialiki humanist albo drobny złodziej. A tut — nie. Tut čystaja natura, celnaja, jak piersanaž savieckaha kino pra padjom caliny.
Kali čynoŭnik piša adkaz Hańnie Sieviaryniec, to adkaz budzie abaviazkova nie pra svaju pracu, a pra Hannu, pra toje, što jana «pieraaceńvaje ŭłasnuju značnaść».
Kali ceły limpijscki čempijon źbirajecca stać deputatam, to na pytańnie žurnalista «navošta?» jon adkaža: «A jakaja vam roźnica?» To bok, razumiejecie, biełaruski čynoŭnik — heta kali ty ŭžo čynoŭnik, navat kali jašče nie čynoŭnik.
Ty sam sabie markier, sam abaznačaješ svaju formu i źmiest.
Ty niedzialimy i zaradžany, jak atam h*ŭna.
Ty — samy ščyry pierad saboj i suśvietam.
Ty ničoha nie chočaš ź siabie vyrablać, ty nie chočaš ničym zdavacca. Ty — taki, jak jość, i chaj usie usprymajuć ciabie pa spravach tvaich.
Kali niejki biezymienny arhanizm, siedziačy ŭ niejkim kabiniecie na niejkim akładzie z pasadavaj instrukcyjaj zabivać muchu raz na piać chvilin, tym nie mieniej ličyć, što maje kryter značnaści dla ŭsich i kožnaha, albo kali jon idzie ŭ deputaty ad imia naroda, prapanujučy narodu ad'*bścisia i nie leźci sa svaimi durackimi pytańniami — heta kaža pra što?
Heta kaža pra vyklučnuju ščyraść, z adnaho boku, i pra žadańnie zachoŭvać dystancyju, pamiž «narodam» i saboj.
Bo jano — ščyraje. Jano choča, kab było bačna, što jano — voś takoje i jano nie siarod nas, a vuń tam. U žoŭtym akiency. Što jano pilna sočyć za taboj, ale ničoha ahulnaha z taboj nie maje, nie choča i nikoli nie budzie mieć.
Heta zatvornictva. Heta pasłušnictva. Heta śviataść i askieza ŭ čystym vyhladzie. Jany adraklisia, pakinuli, adrynuli i dali abiacańnie.
Jurodzivyja z Karła Marksa i inšych słaŭnych vulic majoj krainy! Ja lublu vas. Ja hanarusia vami. Ja saču za vami i taksama nie chaču z vami mieć ničoha ahulnaha.
Mir vam.
