U Śvietłahorskim rajonie milicyja i miascovyja žychary šukali padletka, jaki nie viarnuŭsia dadomu sa škoły.
29 studzienia kala 19.20 svajaki paviedamili ŭ milicyju, što padletak nie viarnuŭsia dadomu sa škoły, raźmieščanaj u vioscy Mikałajeŭka.
Sa słoŭ maci, syn pakinuŭ navučalnuju ŭstanovu ŭ 14.00. Supracoŭnikaŭ milicyi padniali pa tryvozie, ab zdareńni paviedamili miascovym žycharam. Byŭ vyznačany pierymietr pošukaŭ, usia miascovaść raźbita na kvadraty.
Usiu noč milicyjanty i supracoŭniki RANS pad daždžom šukali chłopca. Uličvajučy asablivaści chady padletka, udałosia znajści jaho ślady, jakija viali praz raku Ipa ŭ les, adnak tam hublalisia.
Siońnia kala 12.00 milicyjaniery na ŭskrajku lesu kala vioski Michajłaŭka (prykładna za 5 km ad vioski Mikałajeŭka) zaŭvažyli na aŭtobusnym prypynku źnikłaha chłopca, pramokłaha, jon dryžeŭ ad choładu.
Jak akazałasia, jon noč pravioŭ u lesie pad daždžom. Padletka na słužbovym aŭtamabili dastavili ŭ rajonnuju balnicu, dzie jaho abśledujuć miedyki. Tłumačeńni svajmu ŭčynku chłopiec pakul nie daŭ.
