Rasijski partał Lenta.ru u svaim artykule raspaviadaje čytačam pra aktualnyja aśpiekty biełaruska-polskich adnosin i toje, jak Polšča prasoŭvaje svaje intaresy ŭ Biełarusi z dapamohaj «miakkaj siły».
Rasijski žurnalist Raman Mierankoŭ u pieršuju čarhu źviartaje ŭvahu na telekanał «Biełsat», jaki ciapier časam pazicyjanujecca jak kanał, jaki supraćstaić rasijskaj prapahandzie.
Lenta.ru adznačaje, što na dziasiaty hod isnavańnia biełaruskamoŭnaha kanała jon apynuŭsia pad pahrozaj zakryćcia. Vyratavała jaho damoŭlenaść Varšavy i Łondana stvaryć sumiesny prajekt pa supraćdziejańni rasijskaj prapahandzie. Kožny hod Vialikabrytanija budzie pieradavać Polščy kala $6,84 miljona, častka ź jakich budzie iści na finansavańnie «Biełsata».
Rasijski partał tłumačyć čytačam, što ŭ svoj čas telekanał uskładniŭ i biez taho nie najlepšyja adnosiny Biełarusi i Polščy, sapsavanyja kanfliktam vakoł Sajuza palakaŭ u Biełarusi i prezidenckimi vybarami ŭ 2006 hodzie. Jašče adnoj z prajaŭ polskaj «miakkaj siły» rasijski žurnalist ličyć prahramu Kastusia Kalinoŭskaha. Samaho Kastusia Kalinoŭskaha rasijski žurnalist nazyvaje «kiraŭnikom polskaha paŭstańnia».
Niahledziačy na abvastreńnie adnosin pamiž krainami, na dumku aŭtara, intares u biełarusaŭ da Polščy nie źnik. Raman Mierankoŭ ličyć, što svaju rolu adyhraŭ tut kryzis 2014 hoda — suprać Rasii ŭviali ekanamičnyja sankcyi, jaje ekanomika spała, što taksama paŭpłyvała na ekanomiku Biełarusi. U toj ža čas ekanomika Polščy na padjomie. I heta pry tym, što ŭ hetaj krainie isnuje vialiki deficyt pracoŭnaj siły, vyklikany adjezdam palakaŭ u bolš zamožnyja krainy.
Adliha, jakaja nazirajecca ŭ biełaruska-polskich adnosinach, na dumku žurnalista Lenta.ru, tłumačycca prychodam da ŭłady partyi «Prava i spraviadlivaść». Kaštoŭnasny padychod da Biełarusi źmianiŭsia na bolš prahmatyčny: krainu naviedali vyšejšyja palityčnyja asoby Polščy, a Alaksandr Łukašenka faktyčna zaklikaŭ polskija kampanii vieści biznes u Biełarusi.
Takoje paciapleńnie adnosin pastaviła pad pytańnie dalejšaje funkcyjanavańnie «Biełsata» — Polšča chacieła likvidavać prajekty, jakija razdražniajuć Biełaruś. U pieršuju čarhu heta prajaviłasia ŭ skaračeńni finansavańnia «Radyjo Racyja» na 40%, a taksama źmianščeńni biudžetu «Biełsata» z 5 da 1,5 miljona dalaraŭ, što pryviało b da faktyčnaha zakryćcia kanała.
Ale ŭ vyniku Polšča znajšła vychad ź situacyi. Finansavańnie telekanała z polskaha biudžetu budzie navat pavialičana — da $5,8 miljona, akramia hetaha, kanał atrymaje jašče hrošy i ad brytanskaha ŭrada. A sam «Biełsat», jaki raniej aryjentavaŭsia vyklučna na biełaruskuju publiku, staŭ bolš hłabalnym prajektam, skiravanym na supraćdziejańnie rasijskaj prapahandzie ŭ krainach byłoha SSSR.
