Uzbrojeny pistaletam hramadzianin Rasii pasprabavaŭ abrabavać adździaleńnie Biełarusbanka ŭ Mahilovie dniom 20 listapada. Dobraachvotnym zakładnikam, a zatym i kiroŭcam rabaŭnika staŭ pałkoŭnik milicyi Alaksandr Vasiljeŭ. «U toj momant ja byŭ spakojny jak udaŭ. Uśviedamleńnie taho, što adbyłosia, pryjšło tolki kali ja loh spać», — uspaminaje jon. Pałkoŭnik raspavioŭ TUT.BY, jak upieršyniu ŭ žyćci jamu daviałosia vieści pieramovy pad rulaj pistaleta i vyvodzić zakładnikaŭ ź linii ahniu.
Fota UUS Mahabłvykankama
Telefony pieršaha namieśnika načalnika UUS Mahiloŭskaha abłvykankama — načalnika kryminalnaj milicyi Alaksandra Vasiljeva siońnia nie zacichajuć: usie cikaviacca, jak jon pačuvajecca.
— Dy narmalna ŭsio — heta zvyčajnaja praca. Dziejničaŭ pavodle instrukcyi, — admachvajecca jon žartam.
Ścipła razmaŭlaje. Paźniej skaža, što za 25 hadoŭ jaho słužby ŭ milicyi heta pieršy vypadak u vobłaści, kali pry rabavańni banka ludzi akazalisia ŭ zakładnikach. Dy i dla samoha Alaksandra Vasiljeva heta pieršy dośvied «znosin» z uzbrojenym rabaŭnikom ŭ situacyi, kali pad prycełam znachodzicca siamiora hramadzianskich.
Tryvožnaja knopka ŭ adździaleńni banku na vulicy Kalinoŭskaha spracavała ŭ 14.41 — jaje nacisnuła supracoŭnica, u jakoj złamyśnik zapatrabavaŭ hrošy z kasy.
- Ja byŭ u siabie ŭ kabiniecie, kali pastupiŭ sihnał, što ŭ banku znachodzicca ŭzbrojeny mužčyna. Jak byŭ — u dziełavym kaściumie, — tak i pajechaŭ. Tolki ŭzbroiŭsia. Supracoŭniki Departamienta achovy małajcy — da taho momantu jany chutka i spraŭna ačapili terytoryju, vykanali ŭsie miery zaściarohi, — uspaminaje Alaksandr Vasiljeŭ.
sk.gov.by
Tam, na vulicy, da jaho padbiehła žančyna — supracoŭnica banka, jakaja vystupała pasiarednikam pamiž napadnikam i siłavikami. Jana raskazała, što tam, usiaredzinie, adbyvajecca, pieradała patrabavańni rabaŭnika — pasłać da jaho pradstaŭnika banka.
— Hetaja žančyna — Alena Bursava. Jaje dziejańni vartyja zachapleńnia. Napadnik vypuskaŭ jaje na vulicu, i jana stolki razoŭ mahła ŭciačy — jaje navat prasili ab hetym. Ale jana ŭparta viartałasia nazad, kazała: «Tam maje dziaŭčaty». Ubačyŭšy samaaddanaść hetaj žančyny i razumiejučy, što času niama, ja vyrašyŭ hetym samym supracoŭnikam banka i pradstavicca. Tym bolš u cyvilnym adzieńni ź siłavikoŭ byŭ tolki ja, — kaža Vasiljeŭ i ŭdakładniaje: usie jaho dziejańni «byli ŭzhodnienyja z kiraŭnictvam».
Viedajučy pra toje, što rabaŭnik budzie patrabavać raspranucca ci nie dahała, pałkoŭnik addaŭ kaleham zbroju, usie dakumienty, rečy z kišeniaŭ i «navat źniaŭ halštuk». Falšyvaje proźvišča prydumaŭ na chadu, spadziejučysia na toje, što žychar Rasii — pra toje, što rabaŭnik adtul, jamu skazała Alena, — naŭrad ci viedaje namieśnika načalnika UUS u tvar.
Jak tolki pałkoŭnik uvajšoŭ u adździaleńnie, złamyśnik tut ža nakiravaŭ na jaho zbroju.
— Ja ŭbačyŭ, što pistalet źniaty z zaścierahalnika, kurok uźviedzieny. Heta značyć najmienšy ruch palca — i budzie streł. Ale strachu nie było. Ja razumieŭ, što treba dziejničać aściarožna. Byŭ zahad: usie ludzi pavinny być cełyja i zdarovyja. I ja jaho vykonvaŭ.
Pa słovach Alaksandra Paŭłaviča, napadnik pačaŭ jaho raspytvać pra toje, dzie jon słužyŭ, sprabavaŭ vyśvietlić, ci nie maje jon dačynieńnia da śpiecsłužbaŭ. Pałkoŭnik hraŭ rolu cyvilnaj asoby. Pryčym rabaŭnik vidavočna sprabavaŭ trymać siabie ŭ rukach, spakojna zadavaŭ pytańni, kazaŭ: «Ja nie maju namieru nikoha siońnia zabivać». Ale časam zryvaŭsia, kazaŭ niervova.
Uzbrojeny mužčyna pačaŭ vieści pieramovy praz Vasiljeva. Zapatrabavaŭ, kab padahnali mašynu — u jaje ŭsie siłaviki pavinny skłaści zbroju. U niejki momant adnamu z naviedvalnikaŭ banka — usiaho ich było siamiora - stała błaha.
- Ja jaho ŭhavorvaŭ adpuścić usich i pakinuć tolki mianie ŭ jakaści zakładnika, kazaŭ, što hetaha budzie dastatkova. Jon nie chacieŭ. Ale kali zakładniki adčuli siabie niadobra — siarod ich byli i pažyłyja žančyny, — udałosia zahavaryć jamu zuby i pa čarzie vyvieści ŭsich, - spakojna kaža namieśnik načalnika UUS.
sk.gov.by
Da pryhnanaj pa patrabavańni mašyny złačynca vychodziŭ nie adzin — prymusiŭ iści ź im Vasiljeva, prystaviŭšy jamu pistalet da hałavy. Pavodle słovaŭ pałkoŭnika, napadnik byŭ niezadavoleny tym, što jaho patrabavańnie skłaści ŭ mašynu zbroju siłaviki nie vykanali. Ale mužčyna pavieryŭ, kali Vasiljeŭ skazaŭ jamu, što, maŭlaŭ, usie milicyjanty syšli.
Rabaŭnik zaniaŭ zadniaje siadzieńnie, zahadaŭ Vasiljevu sieści za rul i «jechać, kudy skaža». Pałkoŭnik kaža, jon sam ža čakaŭ momantu, kali možna budzie dać sihnał siłavikam zachapić mužčynu — i jon zdaryŭsia, kali aŭtamabil adjechaŭ pryblizna na 400 mietraŭ ad adździaleńnia banka. Tam stajała pustaja słužbovaja mašyna Departamienta achovy, i rabaŭnik skazaŭ Vasiljevu vyjści i patrabavać, kab jaje prybrali. Pałkoŭnik vyjšaŭ, daŭ sihnał — śpiecapieracyja pa abiasškodžvańni rabaŭnika zaniała imhnieńnie.
— Uśviedamleńnie taho, što mahło b adbycca, pryjšło tolki kali ja loh spać. Kali b ja tady bajaŭsia, u momant zachopu, ničoha b nie vyjšła, — paciskaje plačyma Alaksandr Vasiljeŭ.
Aŭtamabil, u jakim byŭ napadnik, zabłakavali dźviuma słužbovymi mašynami. Razumiejučy, što praciahnuć ruch nie atrymajecca, rabaŭnik vyskačyŭ z aŭtamabila i pasprabavaŭ schavacca ŭ pryvatnym siektary, rastłumačyli ŭ abłasnym USK. Jon adstrelvaŭsia, ale jaho paranili ŭ nahu i zatrymali.
Pavodle dadzienych SK, zatrymany — 28-hadovy hramadzianin Rasijskaj Fiederacyi, u jakoha jość vid na žycharstva ŭ Biełarusi. U vieraśni jon pryjechaŭ u Mahiloŭ da maci.
Z červienia 2009 hoda pa červień 2010 hoda padazravany prachodziŭ terminovuju słužbu va ŭnutranych vojskach MUS Rasii va Uładzivastoku, byŭ radavym zapasu. Sa studzienia 2011 pa studzień 2012 hoda prachodziŭ słužbu ŭ vajenizavanym hornaratavalnym atradzie MNS Rasii ŭ pasiołku Dukat Mahadanskaj vobłaści. Adtul zvolniŭsia pa ŭłasnym žadańni.
Paśla zatrymańnia mužčyna nie nazyvaŭ svaich dadzienych, a tolki prasiŭ: «Zabicie mianie. Nie chaču siadzieć u turmie» — raspaviali va UUS.
— U zatrymanaha padčas pieratrusu vyjavili bolš za 9 tys. biełaruskich rubloŭ, 2 tys. rasijskich rubloŭ i bolš za 100 dalaraŭ, a taksama vydrany im ź sistemnaha błoka kampjutara adździaleńnia banka dysk z zapisami videakamier, — dadała aficyjny pradstaŭnik USK pa Mahiloŭskaj vobłaści Aksana Salaniuk.
Zaviedziena kryminalnaja sprava za zachop zakładnikaŭ. Dapytanyja 6 rabotnikaŭ i 7 naviedvalnikaŭ adździaleńnia banka. Abstaviny spravy vyśviatlajuć.
Na sajcie Biełarusbanka paviedamlajecca, što adździaleńnie na vulicy Kalinoŭskaha 21 listapada nie pracuje.
