Biełarus Vasil Parfiankoŭ — čałaviek niaprostaha losu. Naradziŭsia ŭ 1983 hodzie ŭ Minsku. Pracavaŭ aŭtaślesaram. Da nacyjanalnaha ruchu dałučyŭsia maładym, byŭ aktyvistam niezarehistravanaj Biełaruskaj partyi svabody.
U 2002 hodzie Parfiankoŭ byŭ siarod tych, chto baraniŭ Kurapaty, kali praz uročyšča chacieli prakłaści minskuju kalcavuju darohu. Kali viasnoj taho hoda padpalili ŭ Kurapatach namiot, to Parfiankoŭ vyratavaŭ dvuch čałaviek.
Parfiankoŭ byŭ zatrymany padčas Płoščy-2010. Asudžany da 4 hadoŭ źniavoleńnia. Paprasiŭ ab pamiłavańni ŭ Łukašenki, tamu na volu vyjšaŭ siarod pieršych — u žniŭni 2011. Paśla hetaha Parfiankova nakiroŭvali na prymusovaje lačeńnie ad ałkahalizmu.
U 2014 hodzie jon emihravaŭ va Ukrainu. Ustupiŭ u bataljon AUN, braŭ udzieł u bajavych dziejańniach.
Va Ukrainie Vasil zaśviaciŭsia ŭ niekalkich dziŭnych historyjach. U lutym jon udzielničaŭ u razhromie kijeŭskaha ofisa rasijskaha «Alfa-banka». Jość videa, jak chłopiec raspraŭlajecca z vazonam spatyfiłuma. Sioleta 9 maja palicyja znoŭ zatrymlivała Parfiankova, AUN płanavaŭ sarvać marš «Nieśmiarotny połk» u Kijevie.
Ciapier Vasil ulapaŭsia ŭ novuju historyju. U subotu 21 kastryčnika palicyja aryštavała lidara AUN Mikołu Kachanoŭskaha. Jon pabiŭsia sa svaim paplečnikam Rusłanam Kačmałaj kala stancyi mietro «Akademharadok», kali viartalisia z pachavańnia svajho pabracima.
Kachanoŭski ŭ zapale vychapiŭ traŭmatyčny pistalet i streliŭ. Chutka źjaviłasia palicyja, jakaja i paviazała bujana. Dakumientaŭ na prava našeńnia z saboj pistaleta Kachanoŭski nie maje.
U paniadziełak nad Kachanoŭskim pačaŭsia sud, dzie abirałasia miera strymańnia dla kamandzira AUN. I tut pačałosia samaje cikavaje. Šmatlikaja hrupa padtrymki Kachanoŭskaha stała budavać u sudzie barykady, bić šyby.
«Śviadomyja ludzi hramiać sud, dzie adbyvajecca biasčynstva», — napisaŭ u sacyjalnych sietkach Bahdan Cicki. Kali da budynku stała padjazdžać palicyja, to AUNaŭcy zaklikali ludziej pryvozić da suda šyny i «pačynać Majdan».
Siarod tych, chto budavaŭ u sudzie barykady i biŭsia ź siłavikami, byŭ i Vasil Parfiankoŭ. Na adnym sa zdymkaŭ bačna, jak Vasil papraŭlaje kryšku stała, umacoŭvajučy barykady.
Prychilniki AUN trymali abaronu ŭsiu noč, vytrymali try šturmy. Tolki ranicaj śpiecnazaŭcy zmahli vykinuć ich z zały, najbolš zaŭziatych zatrymali. Vasil Parfiankoŭ akazaŭsia ŭ ich liku.
Deputat Anton Hieraščanka nazvaŭ hetyja padziei «vandalizmam». «Asoby, jakija razhramili sud, pavinny być pryciahnutyja da adkaznaści», — skazaŭ jon.
Zatrymanym inkryminujuć naŭmysnaje psavańnie majomaści, błakavańnie pracy suda i chulihanstva. Usiaho zatrymana kala 30 čałaviek.
***
Na telehram-kanał «Našaj Nivy» možna padpisacca tut.
