Pa pryncypovych pytańniach pamiž Biełaruśsiu i Rasijaj nikoli nie było i nie budzie roznahałośsiaŭ. Pierakananaść u hetym vykazaŭ siońnia žurnalistam kiraŭnik biełaruskaha zamiežnapalityčnaha viedamstva Uładzimir Makiej.
Uładzimir Makiej adznačyŭ, što pamiž subjektami haspadarańnia dźviuch krain mohuć być roznahałośsi, kankretnyja prablemnyja pytańni nie vyklučany ŭ handlova-ekanamičnym supracoŭnictvie. «Ale pa pryncypovych pytańniach źniešniepalityčnaha charaktaru abo źviazanych ź biaśpiekaj pamiž Biełaruśsiu i Rasijaj nikoli nie było i, pierakanany, nie budzie nijakich roznahałośsiaŭ», — padkreśliŭ ministr.
Jon dadaŭ, što ŭ dźviuch krain niama prablem u akazańni padtrymki adzin adnamu na mižnarodnych placoŭkach. «My padtrymlivajem adzin adnaho ŭsiudy, i ŭ nas naładžana vielmi ciesnaje ŭzajemadziejańnie ŭ hetym płanie», — zajaviŭ kiraŭnik biełaruskaha zamiežnapalityčnaha viedamstva.
Ministerstva zamiežnych spraŭ Biełarusi i Rasii ŭ 2016 hodzie pa vynikach sumiesnaj kalehii padpisali prahramu ŭzhodnienych dziejańniaŭ u halinie źniešniaj palityki. U dakumiencie adlustravany ŭsie aśpiekty dvuchbakovaha ŭzajemadziejańnia, u tym liku na mižnarodnych placoŭkach, nahadaŭ Uładzimir Makiej. U červieni źniešniepalityčnyja viedamstvy praviaduć čarhovuju sumiesnuju kalehiju, prymierkavanuju da 25-hodździa ŭstanaŭleńnia dypłamatyčnych adnosin pamiž Biełaruśsiu i Rasijaj.
