15 sakavika sudździa Centralnaha rajonu Homla Siarhiej Karmanovič razhledzieŭ try administracyjnyja pratakoły ŭ dačynieńni da hramadzkaha aktyvista, byłoha aficera milicyi: adzin — za ŭdzieł 19 lutaha ŭ Homli ŭ niesankcyjanavanym «maršy niedarmajedaŭ», i dva, składzienyja siońnia — za chulihanstva i niepadparadkavańnie milicyi.
U vyniku Niapomniaščych pakarany 3 sutkami aryštu i štrafam u pamiery 25 bazavych vieličyniaŭ (575 rubloŭ).
Viny svajoj padsudny nie pryznaŭ, zajaviŭšy, što pavodle Kanstytucyi maje prava na mirnyja schody.
Siońnia ranicaj Uładzimier kiravaŭsia na vakzał, kab jechać u Miensk na akcyju pratestu. Pa darozie nieviadomyja źbili jaho z prymianieńniem piarcovaha hazu, paśla jon byŭ abvinavačany ŭ drobnym chulihanstvie i niepadparadkavańni milicyi. Hetyja padziei Ŭładzimier Niapomniaščych ličyć naŭmysnaj pravakacyjaj, jakuju ŭčynili, kab sarvać jahonuju pajezdku ŭ stalicu.
Śviedčańni supracoŭnikaŭ AMAPu Kurbačova i Kučarava, jakija zajaŭlali pra chulihanstva i niepadparadkavańnie, jon nazvaŭ «hrubym ahavoram i sucelnym padmanam».
«Ja zakryčaŭ tolki, kali mianie pavalili: «Ratujcie, mianie zabivajuć!». Abo mnie treba było moŭčki ciarpieć i pamirać?» — skazaŭ u sudzie abvinavačany ŭ chulihanstvie hramadzki aktyvist.
Na pytańnie Niapomniaščych da kamandzira adździaleńnia AMAPu Alaksandra Kučarava, čamu jon z Kurbačovym nie zatrymaŭ napadnikaŭ, toj adkazaŭ: «A my ich nia bačyli».
