U Łos-Anželesie adbyłasia 37-ja cyrymonija ŭručeńnia premii najhoršaha filma hoda — «Załatoj maliny» — jakaja pa tradycyi pravodzicca napiaredadni cyrymonii «Oskaraŭ». Hałoŭny pryz dastaŭsia dakumientalnaj karcinie režysiora Dyneša D'Soŭzy «Amieryka Chiłary: Tajemnaja historyja Demakratyčnaj partyi», paviedamlaje VVS.
Dyneš D'Soŭza, fota Gabriel Olsen
«Amieryka Chiłary» — heta krytyčny pohlad na Demakratyčnuju partyju ZŠA. U pryvatnaści, Dyneš D'Soŭza abvinavačvaje demakrataŭ u suviaziach z «Ku-Kłuks-Kłanam».
«Što tyčycca amierykanskaj historyi, to adziny ŭrok, jaki D'Soŭza pryniaŭ blizka da serca — heta słovy [amierykanskaha šoŭmiena XIX stahodździa] F. T. Barnuma: «Kožnuju chvilinu na śviet źjaŭlajecca novy łoch», — tak adazvaŭsia pra «Amieryku Chiłary» kinakrytyk vydańnia Movie Nation.
Film D'Soŭzy pieramoh adrazu ŭ čatyroch katehoryjach: najhoršy film, najhoršy vykanaŭca hałoŭnaj roli — usio toj ža D'Soŭza, jaki syhraŭ samoha siabie; najhoršaja režysura — znoŭ D'Soŭza i Brus Skuli, a taksama najhoršaja aktrysa — Beki Ternier, jakaja syhrała Chiłary Klintan, nie pramoviŭšy u filmie ni adnaho słova.
Hetaj paraŭnalna małaviadomaj aktrysie ŭdałosia pabić takich ekrannych «akuł», jak Džulija Robierts (za film «Niaznosnyja łedzi»), Naomi Uots («Dyvierhient-3: Za ścianoj») i Miehan Foks («Čarapaški-nindzia-2»).
Ben Aflek i Hienry Kavił atrymali ŭznaharodu jak najhoršy akciorski ansambl — za film «Betmien suprać Supiermena». Fota AFP
U katehoryi «najhoršy rymiejk, prykvieł, sikvieł» najlepšym, to bok najhoršym, akazaŭsia «Betmien suprać Supiermena». Jon ža pieramoh u katehoryi «najhoršy scenar».
D'Soŭza nazvaŭ «Załatyja maliny» svajmu filmu «žałasnaj pomstaj tych, chto prajhraŭ».
U intervju vydańniu USA Today jon skazaŭ: «Ludzi ŭsio jašče šalejuć z nahody 8-ha listapada [dzień prezidenckich vybaraŭ], i častkova hetaje hałasavańnie — heta apasrodkavana złość na Trampa».
Małabiudžetnaja karcina vyjšła ŭ prakat u lipieni 2016 hoda, jaje kasavyja zbory skłali 13 młn dalaraŭ. Donald Tramp u tvitary zaklikaŭ svaich prychilnikaŭ pajści i pahladzieć «Amieryku Chiłary».
Na sajcie «Załatoj maliny» jość i abjava pra toje, što žury ŭsio jašče čakaje, kali Tramp zabiare svaju «Załatuju malinu», jakuju jon vyjhraŭ u 1991 hodzie za epizadyčnuju rolu samoha siabie ŭ filmie «Pryvidy hetaha nie robiać» («Ghosts can't Do It).
