Lidar francuzskich krajnie pravych Maryn Lo Pien 4 lutaha apublikavała svaju pieradvybarčuju prahramu z 144 punktaŭ.
4 i 5 lutaha partyja Nacyjanalny front pravodzić u Lijonie šerah mierapryjemstvaŭ, jakija pavinny dać aficyjny start vybarčaj kampanii Maryn Lo Pien. Apytańni pa-raniejšamu pradkazvajuć lidaru krajnie pravych pieršaje miesca ŭ pieršym tury vybaraŭ prezidenta 23 krasavika. U druhim tury 7 maja, pavodle apytańniaŭ, Maryn Lo Pien prajhraje.
Prapanovy Maryn Lo Pien raźmierkavany pa siami raździełach, jakija adlustroŭvajuć hałoŭnyja temy kampanii — Francyja «svabodnaja», «biaśpiečnaja», «kvitniejučaja», «spraviadlivaja», «z honaram», «mocnaja», a taksama Francyja, što maje ŭstojlivaje raźvićcio.
Na ŭsienarodny refierendum Maryn Lo Pien maje namier vynieści pytańnie ab prynaležnaści Francyi da Jeŭrapiejskaha sajuza. U chodzie hałasavańnia, spadziajecca kiraŭnik Nacfronta, francuzy pavinny «viarnuć sabie čatyry suvierenitety» — valutny, zakanadaŭčy, terytaryjalny i ekanamičny. Admova ad adzinaj jeŭrapiejskaj valuty jeŭra ŭ prahramie nazvana «adnaŭleńniem nacyjanalnaj valuty».
U prahramie kandydata ŭtrymlivajucca tradycyjnyja patrabavańni Nacfrontu — adnaŭleńnie nacyjanalnych miežaŭ, vychad z Šenhienskaj zony, skaračeńnie imihracyi z 200 000 da 10 000 čałaviek u hod, pazbaŭleńnie nielehalnych mihrantaŭ mahčymaści ŭzakonić svajo znachodžańnie ŭ Francyi.
U svajoj pieradvybarčaj prahramie Maryn Lo Pien admoviłasia ad patrabavańniaŭ adnavić śmiarotnaje pakarańnie. Dla pakarańnia asabliva ciažkich złačynstvaŭ jana prapanoŭvaje prymianiać «realnaje pažyćciovaje źniavoleńnie». Na praciahu piaci hadoŭ kandydat abiacaje pavialičyć lik «pasadačnych» miescaŭ u francuzskich turmach na 40 000.
U svajoj ekanamičnaj prahramie Maryn Lo Pien prapanuje viarnuć piensijny ŭzrost 60 hadoŭ, a pracoŭny staž, nieabchodny dla atrymańnia poŭnaj piensii, abmiežavać 40 hadami. Palityk maje namier admianić libieralnuju reformu Pracoŭnaha kodeksa, jakuju pravioŭ prezident Fransua Aland.
Maryn Le Pion abiacaje spraścić administracyjnyja i padatkovyja pracedury dla małych i siarednich pradpryjemstvaŭ, a taksama refarmavać padatak na prybytak.
Nie abyšłosia ŭ prahramie kiraŭnika Nacfronta i biez «padarunkaŭ» samym małazabiaśpiečanym vybarščykam: ludziam z dachodam da 1500 jeŭra ŭ miesiac Le Pien abiacaje śpiecyjalnuju «premiju pakupnickaj zdolnaści» na sumu 200 jeŭra. Finansavać hetuju dapłatu kandydat prapanoŭvaje za košt novaha 3-adsotkavaha padatku na impart.
Lider krajnie pravych maje namier pavialičyć abaronny biudžet krainy da 3% VUP, ale pry hetym vystupaje za toje, kab Francyja pakinuła vajennaje kamandavańnie NATA (u heta kamandavańnie Francyja viarnułasia pry prezidencie Nikala Sarkazi).
Maryn Lo Pien prapanuje ad mažarytarnaj sistemy vybaraŭ deputataŭ francuzskaha parłamienta pierajści da praparcyjnaj i skaracić kolkaść Nacyjanalnaha schodu (z 577 da 300 čałaviek) i Sienata (z 348 da 200).
