Franak Viačorka raskazaŭ, jaki rachunak atrymaŭ ad amierykanskaj balnicy za lačeńnie paśla pierałomu nahi.
Nahadajem, jon atrymaŭ paškodžańnie padčas tavaryskaha futbolnaha matča dyjaspar Biełarusi i Uźbiekistana. Hulnia prachodziła ŭ Ńju-Jorku.
Letaś Viačorka pastupiŭ u amierykanskuju VNU.
«Za pałamanuju nahu ŭ Amerycy mnie vystavili rachunak na 91850 dalaraŭ i jašče 12 tysiačaŭ za reabilitacyju. Viadoma, balšyniu z hetaj sumy zapłaciła strachavaja, ale i mianie špital zrabiŭ daŭžnikom, — piša Franak Viačorka ŭ fejsbuku. — Adkul biarucca hetyja zavobłačnyja rachunki — nie razumieju. Try dni ŭ pałacie — 13680$. To bok 4500 na dzień. Vyklik chutkaj dapamohi — 5000$. Arenda aperacyjnaj i abstalavańnia — 32670$. Pasłuhi lekara — 8800$. Kožny renthien — 900$ (a ich było 5 štuk).
Vy dumajecie, heta byŭ elitny špital? Ničoha padobnaha. Samy prosty (ale i niesaviecki) špital na Bruklinie. Ničym nia lepšy za biełaruskija špitali, prykładna ŭzroŭniu 432-ha Vajskovaha špitala ŭ Miensku (na Mašerava).
Dyk voś. Paśla aperacyi špital i lekary vysłali asobnyja rachunki za svaje pasłuhi ŭ strachavuju. Taja ź imi handlavałasia. Z špitalnaha rachunku (82 tys) spačatku skinuli 50% (maŭlaŭ, student i ŭsio takoje). Strachavaja zapłaciła 35000$. Rešta — 6700 zastałasia na mnie. Ź inšaha rachunku za pasłuhi lekara (9835$) strachavaja ničoha nie zapłaciła, a lekary, doŭha nie čakajučy, pieradali spravu kalektaram. Zrešty, płacić u mianie niama čym, i kanfiskavać u mianie niama čaho (moj invalidny samakat — i toj skrali). Źbirajusia pačać novy peryjad pieramovaŭ sa špitalom i strachavoj, kab prabačyli ci źmienšyli hetuju sumu. Universytet abiacaje zastupicca taksama.
A ŭjavicie, kali b heta stałasia ŭ čałavieka biez strachoŭki? Bankructva ŭ imhnieńnie, strata žytła i majomaści. Tamu amerykancy i pieražyvajuć hetak mocna z-za tak zvanaha «Abamaker» — strachoŭki dla asabliva uraźlivych sacyjalnych hrupaŭ.
Voś taki jon, advarotny bok amerykanskaha dabrabytu».
