Ad dałučeńnia Polščy da Jeŭrasajuza ŭ 2004 hodzie Polšča ŭ roznych formach vydatkavała na padtrymku biełaruskaj demakratyi kala 140 miljonaŭ jeŭra. Pra heta ŭ interviju hazecie «Rzeczpospolita» zajaviŭ dyrektar Polskaha instytutu mižnarodnych dačynieńniaŭ Słavamir Dembski.
«My pavinny praciahvać padtrymlivać biełaruskuju niezaležnaść, ale nieabchodna padumać pra mietady», — skazaŭ Dembski.
Na pytańnie žurnalista, ci pavinna Polšča dziela hetaha padtrymlivać Łukašenku, Dembski adkazaŭ:
«My pavinny davać Łukašenku mahčymaść pašyreńnia pola palityčnaha manieŭru. U praktycy heta aznačaje, što treba ŭvachodzić ź im u palityčnaje ŭzajemadziejańnie. Kali Łukašenka choča ciapier stvaryć karysnyja ŭmovy dla palityčnaj i ekanamičnaj supracy pamiž našymi krainami, to varta pra heta padumać».
Žurnalista cikaviła taksama, ci canoju parazumieńnia z Łukašenkam pavinna być zakryćcio telekanała Biełsat. Na heta Słavamir Dembski adkazaŭ:
«Biełsat — heta instrumient našaj palityki adnosna Biełarusi, i peryjadyčna jon pavinien aceńvacca praz pryzmu efektyŭnaści. Mižnarodny kantekst mianiajecca, tamu treba padumać, ci nie dapasavać da jaho našyja instrumienty. Kali Alaksandr Łukašenka chacieŭ by schilić polskija ŭłady padumać nakont pracy Biełsata, to ja liču, što ŭ jaho pavinna być ideja na niejki palityčny ekvivalent».
Polski instytut mižnarodnych dačynieńniaŭ Słavamir Dembski ŭznačalvaje ad lutaha 2016 hoda. Heta hałoŭnaja daradčaja ŭstanova polskaha ŭrada ŭ halinie zamiežnaj palityki.
