Na sajcie Pałaty pradstaŭnikoŭ źjaviłasia padrabiaznaja infarmacyja pra deputataŭ — dzie naradzilisia, dzie vučylisia, dzie pracavali. «Naša Niva» sabrała cikavuju statystyku.
Radzima ciozak-deputataŭ
…Vioska Subotniki pad Iŭjem pieradusim viadomaja jak radzima Zianona Paźniaka. Ale ŭ heta sklikańnie parłamienta trapili adrazu dva ŭradžency Subotnikaŭ, pryčym jašče i ciozki! Valancina Kursievič — zahadčyca adździaleńnia staličnaj balnicy, a Valeryj Kursievič — dyrektar rysornaha zavoda MAZ.
Adnak siarod astatnich abłaściej Hrodzienščyna na apošnim miescy. Sprava ŭ tym, što mienavita tut najmienš ciahnuli ŭ parłamient «svaich». Tolki pałova deputataŭ ad Hrodzienščyny naradziłasia na terytoryi vobłaści.
Rejtynh pa abłaściach vyhladaje nastupnym čynam:
- Brestčyna — 19
- Homielščyna — 17
- Minščyna — 14
- Mahiloŭščyna — 14
- Viciebščyna — 13
- Hrodzienščyna — 11
- Minsk — 11
+za miežami Biełarusi — 11
Vosiem čałaviek z Rasii, try z Kazachstana
Najdalniaje miesca naradžeńnia ŭ homielskaj deputatki Aleny Astapiuk — až va Usuryjsku, za 10 tysiač km ad Minska.
Adnak absalutnaja bolšaść tych, chto naradziŭsia pa-za miežami krainy, atrymali adukacyju ŭ Biełarusi.
Vyklučeńniaŭ niekalki. Namieśnik staršyni ŁDPB Anatol Chiščanka naradziŭsia na Branščynie, advučyŭsia ŭ Rastovie-na-Donie i tolki paśla pryjechaŭ pracavać u Babrujsk.
A voś Uładzimira Bazanava, jaki pachodzić z-pad Vołahdy i skončyŭ Kałomienskaje artyleryjskaje vučylišča, pieraviali słužyć u Brest.
Najbolš piedahohaŭ i miedykaŭ
Ciapier pra adukacyju. Samym papularnym siarod deputataŭ (kali nie ŭličvać Akademiju kiravańnia, kudy słužboŭcy pastupajuć masava) pradkazalna akazaŭsia Biełaruski dziaržaŭny ŭniviersitet — 10 vypusknikoŭ na ŭsie fakultety.
Uśled iduć Piedahahičny ŭniviersitet (8 čałaviek), Homielski dziaržaŭny ŭniviersitet (7 čałaviek) i BNTU (6 čałaviek).
Što da «profilaŭ» adukacyi, to siarod deputataŭ najbolš piedahohaŭ (19 čałaviek) i miedykaŭ (14 čałaviek).
Adukacyja siłavikoŭ
Prafiesijnych siłavikoŭ u parłamiencie šaściora, uklučna sa zhadanym raniej Bazanavym. U biełaruskich vajskoŭcaŭ zvyčajna pa niekalki vyšejšych adukacyj, pieravažna atrymanych u Rasii. Dzie jany vučylisia?
Siarhiej Bobrykaŭ — artyleryst. Jon skončyŭ Kałomienskaje vyšejšaje artyleryjskaje kamandnaje vučylišča, Vajennuju artyleryjskuju akademiju ŭ Sankt-Pieciarburhu i Vajennuju akademiju Hienštaba Rasii.
Čynoŭnik z Mazyra Leanid Pisanik skončyŭ Ryžskaje vyšejšaje vajenna-palityčnaje vučylišča i Vajenna-palityčnuju akademiju ŭ Maskvie.
Valer Hajdukievič advučyŭsia ŭ Razanskim vyšejšym pavietrana-desantnym kamandnym vučyliščy, a taksama ŭ Vajennaj akademii imia Frunze i Vajennaj akademii rasijskaha Hienštaba (abiedźvie ŭ Maskvie).
Alaksandr Markievič paśpieŭ skončyć Leninhradskaje vyšejšaje vajenna-palityčnaje vučylišča, Maskoŭskuju dziaržaŭnuju jurydyčnuju akademii i navat Pahraničnuju akademiju FSB Rasii.
Pieršy namieśnik ministra ŭnutranych spraŭ Valancin Michnievič, zvolnieny pa stanie zdaroŭja, vučyŭsia ŭ Taškienckaj vyšejšaj škole milicyi.
Vajskoŭcam moža ličyć i eks-kandydata ŭ prezidenty Mikałaja Ułachoviča, vypusknika Simfieropalskaha vyšejšaha vajenna-palityčnaha budaŭničaha vučylišča. Ale ŭ realnaści jon zajmaŭsia budoŭlaj.
Nivodnaha vypusknika biełaruskich vajennych ci milicejskich navučalnych ustanovaŭ siarod deputataŭ niama.
