Minčuk u čužoj kvatery varyŭ samahon, i ŭ jaho vybuchnuŭ pierahonny aparat, paviedamili ŭ HUUS Minharvykankama.
«Paviedamleńnie ab vybuchu ŭ Pieršamajskaje RUUS pastupiła ad žycharki doma pa zav. Kalinina. Pa jaje słovach, jana pačuła huk, padobny da vybuchu, pry hetym u adnoj z kvater vyrvała dźviery, adkul staŭ danosicca rezki pach. Jašče adna zajava pastupiła ad uładalnika aŭtamabila «Nisan», jaki raspavioŭ, što ŭ vyniku vybuchu na mašynie ŭtvarylisia skoły łakafarbavaha pakryćcia na kapocie i dachu», — adznačyli ŭ HUUS.
Jak vyśvietliłasia, sam haspadar kvatery ničoha nie viedaŭ pra toje, što ŭ jaho budzie vyrablacca ałkaholny napoj. Źbirajučysia da znajomych na vychadnyja, jon pieradaŭ klučy ad kvatery svajmu 56-hadovamu pryjacielu. Paśla vychadnych, nie viartajučysia dadomu, jon adrazu ž adpraviŭsia na pracu, dzie ź im źviazaŭsia niaŭdačlivy kvatarant i paviedamiŭ, što ŭ kvatery varyŭsia samahon, a pierahonny aparat pry hetym vybuchnuŭ. Pryjechaŭšy dadomu, haspadar akramia hościa vyjaviŭ milicyjantaŭ, supracoŭnikaŭ MNS i UP «Minhaz».
U dačynieńni da niaŭdačlivaha samahonščyka składzieny administracyjny pratakoł pa č.1 st.12.43 KaAP Respubliki Biełaruś (vyrab abo nabyćcio mocnych ałkaholnych napojaŭ (samahonu), paŭfabrykataŭ dla ich vyrabu (brahi), zachoŭvańnie aparataŭ dla ich vyrabu). Sankcyi dadzienaha artykuła ciahnuć papiaredžańnie abo nakładańnie štrafu ŭ pamiery da 5 bazavych vieličyń (bazavaja vieličynia ciapier składaje Br21) z kanfiskacyjaj nazvanych napojaŭ, paŭfabrykataŭ i aparataŭ.
