Hetyja płany abmiarkoŭvalisia siońnia ŭ haradskoj ratušy ŭ čas dakłada Alaksandru Łukašenku ab pierśpiektyvach raźvićcia stalicy.
Pa słovach staršyni kamiteta architektury i horadabudaŭnictva Minharvykankama, hałoŭnaha architektara Minska Paŭła Łučynoviča, praduhledžvajecca budaŭnictva 14 pierachoplivajučych šmatuzroŭnievych padziemnych stajanak, jakija pavinny źjavicca na ŭjezdach u horad.
«Akramia taho, budziem pracavać nad abmiežavańniem ujezdu transpartu ŭ centralnuju častku horada pa takim ža pryncypie. Heta značyć buduć stvorany pierachoplivajučyja parkinhi kala stancyj mietro ŭ centry horada i kala vialikich čyhunačnych stancyj», — skazaŭ jon.
«Kali vy heta budziecie rabić, vy pavinny mieć adziny typavy prajekt. My pavinny jašče raz paličyć, kolki heta budzie kaštavać», — adznačyŭ A.Łukašenka.
Kiraŭnik krainy pahadziŭsia z tym, što nieabchodna padšturchnuć aŭtaamataraŭ dla taho, kab jany karystalisia parkinhami. «A heta, pierš za ŭsio, cana. Paličycie, kab jana była narmalnaj, — daručyŭ kiraŭnik dziaržavy. — Druhoje - pa minimalnaj canie jany taksama nie buduć tam stavić aŭtamabil, kali jaho možna kinuć u luboj kropcy Minska».
U hetym pytańni Alaksandr Łukašenka zaklikaŭ dziejničać akuratna, vykarystoŭvajučy ŭ tym liku dośvied inšych staličnych haradoŭ śvietu.
«Unosicie razumnyja prapanovy, kab my nie abvastryli adnosiny ź ludźmi. Kab ludziam było zrazumieła: voś - parkinh, voś - košt. Cana pavinna być prymalnaj», - skazaŭ kiraŭnik krainy.
«My pavinny stvaryć takija ŭmovy dla minčan, kab dla ich było bolš vyhadna i kamfortniej pierasoŭvacca na hramadskim transparcie, čym na asabistaj mašynie», - adznačyŭ Pavieł Łučynovič.
