Padčas akcyi va ŭsich kinateatrach Homielskaj vobłaści projduć pakazy mastackich filmaŭ, źniatych pavodle tvoraŭ biełaruskich piśmieńnikaŭ, paviedamiła BiełaPAN viadučy redaktar KUP «Homielkinavideaprakat» Śviatłana Tarasienka.
Siarod filmaŭ, jakija buduć pakazanyja ŭ dnia akcyi, — «Dzikaje palavańnie karala Stacha» pavodle adnajmiennaj apovieści Uładzimira Karatkieviča, «Vaźmu tvoj bol» pavodle adnajmiennaha ramana Ivana Šamiakina, «Cuda-vostraŭ, abo Paleskija rabinzony» pavodle apovieści Janki Maŭra «Paleskija rabinzony».
Buduć taksama demanstravacca chronika-dakumientalnyja filmy pra biełaruskich paetaŭ i prazaikaŭ. Tak, stužka «I kružycca płanieta Kulašova» raskaža pra žyćcio i tvorčaść narodnaha paeta Biełarusi Arkadzia Kulašova, «Piaśniar z Naračanskaha kraju» — Maksima Tanka, «Ja — dziaŭčynka na šary» — Raisy Baravikovaj.
2 vieraśnia ŭ kinateatry «Pramień» Rahačova zapłanavanaja tvorčaja sustreča z adnym ź viadučych režysioraŭ-multyplikataraŭ studyi animacyjnych filmaŭ kinastudyi «Biełaruśfilm» Alaksandra Lenkina.
«Jon pracuje na «Biełaruśfilmie» ŭžo bolš za 30 hadoŭ, — adznačyła Tarasienka. — Za hety čas jon źniaŭ dziasiatki animacyjnych filmaŭ, jakija nieadnarazova ŭdastojvalisia pryzoŭ mižnarodnych i nacyjanalnych fiestyvalaŭ. Stvareńnie multfilma padobnaje čaraŭnictvu, a prafiesija animatara napoŭnienaja mahijaj. Umieńnie multyplikataraŭ ažyŭlać karcinki nie raz prymušała hledačoŭ zachaplacca ich pracaj. U Rahačovie režysior pryŭźnimie zasłonu tajamnicy i praviadzie majstar-kłas pa stvareńni animacyjnaha filma».
Zavieršycca sustreča pakazam multfilmaŭ, źniatych pavodle biełaruskich kazak.
