Na kraŭdfandynhavaj płatformie talaka.by užo tydzień jak raspačaty zbor srodkaŭ na ekranizacyju apaviadańnia Vasila Bykava «Narodnyja mściŭcy». U siužecie filma raspaviadajecca pra BSSR na miažy 50-60 hadoŭ minułaha stahodździa. Film abiacaje ŭźniać vielmi važkija ahulnačałaviečyja i biełaruskija temy, jakija zaŭsiody zakranaje ŭ svaich tvorach Vasil Bykaŭ.
«Čaćviora viaskoŭcaŭ patrochu starejuć, chto pracuje, chto pacichu śpivajecca, niechta narešcie siak-tak uładkavaŭsia ŭ žyćci, u jakim było ŭsiaho — niadaŭniaja vajna, papiaredniaja kalektyvizacyja, ssyłki i rasstreły. Adnym ciopłym letnim nadviačorkam u viosku naviedvajecca toj, kaho daŭno i z radaściu ličyli źnikłym — čekist Vusaŭ. Heta jon kaliści panavaŭ tut, ssyłaŭ i rabavaŭ u hetych miaścinach, heta jon katavaŭ, zabivaŭ baćkoŭ i bratoŭ hałoŭnych hierojaŭ. Za heta jamu nie było aničoha. A ciapier jašče, akazvajecca, piersanalnaja piensija, honar i pavaha. U nachłynułych uspaminach za plaškaj harełki hieroi vyrašajuć adpomścić čekistu. I niama ničoha mienšaha, čym śmierć, kab raskvitacca za toje, što jon zrabiŭ».
Arhanizatary źviarnulisia da biełarusaŭ i prosta nieabyjakavych ludziej: «Moža, ciapier i nie samy ŭdały čas dla takich spraŭ, ale čakać «lepšych časoŭ» dakładna nie varyjant. Usio źmianiajecca, abstaviny, my z vami, entuzijazm, ź jakim ty niešta robiš u junactvie i maładości. Tamu, spadziajusia, u hetym hodzie, z vašaj dapamohaj i biez zanadta vialikich pieraškodaŭ płanujem davieści film da pakazu ŭ kinateatrach, fiestyvalach inš. Dla hetaha patrebnyja, aproč inšaha, staryja ci novyja — nie važna, ale ž hrošy. Kab realna pačać karystacca zborami z płatformy, treba minimum 25% ad ahulnaj sumy i jak maha raniej, kab pačać zdymać. U hetym i patrebnaja vaša dapamoha. Pryčym, akramia hrošaj, heta mohuć być pasłuhi i resursy».
Na siońniašni momant sabrana 18% ad patrebnaj sumy. Ahułam kamandzie patrebna 12 000 rubloŭ (6 tysiač dalaraŭ). Kaardynatar prajekta Alaksandr Mielichaviec padzialiŭsia z «NN» padrabiaznaściami pra stvareńnie ekranizacyi tvora vybitnaha biełaruskaha piśmieńnika.
Alaksandr Mielichaviec
«Pačniom z taho, što Bykaŭ – moj ulubiony piśmieńnik. Naprykancy škoły i paśla ja pieračytaŭ usie jaho tvory, publicystyku i inš. Ideja ekranizavać Bykava mianie pieraśleduje šmat hod. U jaho jeść vielmi kiniematahrafičnyja tvory, ja nie kažu ŭžo pra cikavuju tematyku i idei. Dla pačatku ja vybiraŭ tvor, jaki b spałučaŭ u sabie cikavyja idei, nievialiki abjom, kab jon byŭ nie nadta ciažki ŭ sensie pastanoŭki, kab było mažliva zdymać ź mikrabiudžetam. Da taho ž, temu vajny tak zaciahali nie samyja ščyryja i prafiesijnyja kiniematahrafisty.
Nakont movy navat nie było pytańniaŭ, Bykaŭ pavinien zdymacca na movie aryhinału.
Z 2009 hoda ja pačaŭ surjozna zajmacca hetym prajektam. U kožnaha tak byvaje, što ź ciaham času sychodzić impet, apantanaść, entuzijazm. Ale ja ŭsio ž uziaŭ siabie ŭ ruki i vyrašyŭ, što adkładać bolš nielha. Tak i zapuściŭ kraŭdfandynhavuju kampaniju. Kamanda prajekta nieadnarazova źmianiałasia za hady i etapy pracy. Na siońnia bolšaść akcioraŭ zaćvierdžanaja, ciapier tolki ŭdakładniajecca skład techničnaj hrupy. Ale, biezumoŭna, ŭsio budzie zaležać ad finansavańnia taksama.
U kamientarach da navin pra zbor srodkaŭ šmat pišuć pra toje, što, maŭlaŭ, nie leź, chto ty taki, hetym pavinny zajmacca prafiesijanały z adukacyjaj i biudžetam. Ja zhodzien z hetym. Ale ž dzie hetyja prafiesijanały? Kali chtości paśla zdymie štości lepš, ja budu tolki rady. Čakać ja nie mahu, i tak šmat času prajšło. Treba rabić».
