Uviadzieńnie Rasijaj sankcyj i abmiežavańni na pastaŭku tureckich harodniny i sadaviny naŭrad ci dasiahnuli svaich «vychavaŭčych» metaŭ, ličać u Rasijskaj akademii narodnaj haspadarki i dziaržaŭnaj słužby (RANHiDS).
U Turcyi ad embarha bolš za ŭsio paciarpieli vytvorcy ahurkoŭ, jakija nie zmahli pieranakiravać svaju pradukcyju ŭ inšyja krainy. A voś vytvorcy pamidoraŭ i inšaj harodniny, na dumku akademii, pieraaryjentavalisia na inšyja rynki, naprykład, na Biełaruś i Azierbajdžan.
Rasija zapłaciła za uviedzienyja uradam sankcyi rostam cen na niekatoryja tavary, ličać ekśpierty. Harodnina, jakuju jana ŭvozić ź inšych krain, akazałasia bolš darahoj, čym tureckaja pradukcyja. Asabliva prykmietny efiekt ad embarha ŭ zimovyja miesiacy, kali prapanova ŭłasnaj pradukcyi ŭ Rasii abmiežavanaja.
Usiaho ŭ Rasii ŭ hod vyrablajecca kala 117 kiłahramaŭ harodniny na adnaho čałavieka. Kraina pry hetym impartuje ŭ hod kala 20 kiłahramaŭ na adnaho čałavieka. Usiaho za hod u Rasii spažyvajecca kala 126 kiłahramaŭ harodniny na čałavieka.
Rašeńnie ab uviadzieńni embarha na pastaŭki šerahu tureckich tavaraŭ u Rasiju ŭrad pryniaŭ u kancy minułaha hoda paśla incydentu z rasijskim samalotam Su-24, źbitym tureckaj bokam.
Na praciahu 2016 hoda Rasija praciahvała abmiažoŭvać ŭvoz harodniny z Turcyi, tłumačačy heta fitasanitarnymi pryčynami. Takim čynam byŭ abmiežavany ŭvoz piercu, hranataŭ, bakłažanaŭ, kabačkoŭ i harbuzaŭ, jakija nie patrapili pad embarha.
Da pryniaćcia abmiežavańniaŭ Rasija ŭ asnoŭnym zaležała ad pastavak z Turcyi tamataŭ, vinahrada i mandarynaŭ, jakija zajmali istotnuju dolu na rynku. Pryčym časta ceny na niekatoryja tureckija tavary byli nižejšyja za rasijskija.
U RANHiDS sumniajucca ŭ efiektyŭnaści «vychavaŭčaha» charaktaru sankcyj, uviedzienych suprać Turcyi ci inšych krain. Z-za devalvacyi rubla ŭ Rasii rezka padaražeła impartnaja pradukcyja, a rasijanie rezka skaracili popyt. Heta pastaviła ŭ niespryjalnyja ŭmovy ŭsich imparcioraŭ i abmiežavała efiekt ad sankcyj. U niavyhadnym stanoviščy akazalisia ŭsie handlovyja partniory Rasii.
Siarod tych, chto ŭsio ž taki vyjhraŭ ad sankcyj, akazałasia Biełaruś. Niahledziačy na padabienstva klimatyčnych umoŭ, jana naraściła pastaŭki ŭ Rasiju mnohich ciepłalubivych kultur, uklučajučy čarešniu, kivi i kłubnicy. Paralelna Biełaruś pavialičyła impart šmat jakoj harodniny i sadaviny, što, na dumku ekśpiertaŭ, chutčej za ŭsio, śviedčyć ab reeksparcie.
