Pradstaŭniki demakratyčnych partyj i arhanizacyj ličać spravu zatrymanaha błohiera Eduarda Palčysa, viadomaha jak Džon Silvier, «vyklučna palityčnaj» i zaklikajuć pryznać jaho viaźniem sumleńnia i palityčnym viaźniam. Takuju zajavu padpisali Vital Rymašeŭski, Pavieł Sieviaryniec, Alaksiej Janukievič, Iryna Vieštard, Alena Jaśkova, Mikałaj Statkievič, Hienadź Fiadynič, Viačasłaŭ Siŭčyk i Alaksandr Buchvostaŭ.
U dakumiencie adznačajecca, što ŭ dačynieńni da Palčysa raspačatyja kryminalnyja spravy za «raspalvańnie mižnacyjanalnaj varožaści», «raspaŭsiudžvańnie parnahrafii» i «parušeńnie padpiski ab niavyjeździe».
«Na samaj spravie vidavočna, što kryminalny pieraśled Eduarda — pomsta za jaho antyimpierskija publikacyi na sajcie www.1863x.com, — havorycca ŭ zajavie. — Historyk pa adukacyi, Eduard raskryvaŭ zachopnickuju i ahresiŭnuju sutnaść siońniašniaj palityki Kramla i zaklikaŭ biełarusaŭ rychtavacca da abarony niezaležnaści».
Pradstaŭniki demakratyčnych arhanizacyj zapatrabavali nieadkładnaha vyzvaleńnia Palčysa i spynieńnia jaho pieraśledu.
Palityki źviarnulisia da jeŭrapiejskaj supolnaści i ZŠA z zaklikam zrabić usie mahčymyja zachady dla vyzvaleńnia Eduarda Palčysa, a taksama zaklikali biełaruskaje hramadstva i mižnarodnuju supolnaść da salidarnaści ź im.
«Eduard praz advakata zajaviŭ, što nie choča być palitviaźniam. Ale my ŭsie viedajem, u jakich umovach znachodziacca biełaruskija viaźni, asabliva na etapie śledstva. Toje ž, što ŭłady dazvolili advakatu zrabić hetuju zajavu, zvyčajna patrabujučy nievydavańnia, śviedčyć, što na Eduarda moža rabicca vialiki nacisk i jaho ŭviali ŭ zman. Pryznańnie jaho palitviaźniam — heta adzinaje, što moža jaho abaranić ad niepaźbiežnaha asudžeńnia. Jon aryštavany za svaju palityčnuju dziejnaść i pa ŭsich standartach źjaŭlajecca palitviaźniam», — cytuje sustaršyniu arhkamiteta pa stvareńni partyi «Biełaruskaja chryścijanskaja demakratyja» Vitala Rymašeŭskaha pres-słužba arhanizacyi.
