U Rasii bolš niama aliharchaŭ, zastalisia tolki bahatyja ludzi, zajaviŭ kiraŭnik Centra stratehičnych raspracovak Alaksiej Kudryn, vystupajučy na Pieciarburhskim ekanamičnym forumie.
«Aliharchi — heta ludzi, jakija ŭpłyvajuć na ŭładu. Siońnia jany prosta bahatyja ludzi, siońnia jany nie aliharchi u tym sensie, u jakim pieršapačatkova heta słova vykarystoŭvałasia», — skazaŭ ekanamist.
Kłasičnaje vyznačeńnie aliharchii zvodzicca da palityčnaha režymu, pry jakim ułada zasiarodžanaja ŭ rukach adnosna nievialikaj hrupy asob, jakaja, jak praviła, kantraluje i bujny kapitał.
Tym nie mienš, «Vialiki tłumačalny słoŭnik» ruskaj movy daje jašče adno vyznačeńnie aliharcha: pradstaŭnik bujnoha kapitału — biezadnosna jaho ŭpłyvu na ŭładu.
Razvažajučy pra ŭdzieł bahatych rasijan u dabračynnaści, Alaksiej Kudryn zakranuŭ temu mižnarodnaj inicyjatyvy The Giving Pledge, u Rasii viadomaj jak Klatva dareńnia. U 2010 hodzie amierykanskija miljardery Uoren Bafiet i Bił Hiejts zaklikali inšych bahatych ludziej płaniety adpisvać nie mienš za pałovu majomaści na dabračynnaść.
Kudryn zajaviŭ, što viedaje tolki dvaich rasijan, jakija dałučylisia da kampanii: heta miljardery Uładzimir Patanin i Juryj Milnier.
«Jany jakraz vielmi šmat robiać dla raźvićcia inavacyj i adukacyi. Možna tolki vitać hetyja surjoznyja pačynańni», — cytuje RBK ekanamista.
