Japonskaja karparacyja Mitsubishi pačała vyprabavańni pieršaha źniščalnika piataha pakaleńnia ŭłasnaj raspracoŭki, piša Financial Times.
ft.com
Pavodle mierkavańnia ekśpiertaŭ, hetaja padzieja śviedčyć pra toje, što honka ŭzbrajeńniaŭ va Uschodniaj Azii robicca bolš aktyŭnaj — anałahičnyja mašyny raspracoŭvajuć Kitaj i RF.
Pieršy ekzemplar novaj mašyny byŭ pakazany ŭ studzieni 2016 hoda. U bližejšyja dva hady japonski ŭrad płanuje pryniać rašeńnie pra praciah samastojnaj raspracoŭki źniščalnika piataha pakaleńnia ci pra ŭdzieł u mižnarodnaj kaapieracyi na hetuju temu.
U X-2 Shinshin realizavanyja niekalki technałohij małazaŭvažnaści, u tym liku adpaviednyja hieamietryčnyja formy i radyjopahłynajučyja materyjały.
Mitsubishi ŭ časy Druhoj suśvietnaj vajny vyrablała samy masavy i viadomy japonski źniščalnik — «Ziero».
Pieršy palot japonskaha X-2 Shinshin
Źniščalnik taksama atrymaje šmatrežymny radar z aktyŭnaj faziravanaj krataj, optavałakonnuju sistemu kiravańnia sa šmatrazovym dublavańniem kanałaŭ, sistemy radyjoelektronnaj baraćby i intehravanuju sistemu abmiena infarmacyjaj. Samalot taksama maje ruchaviki z usierakursnym kiravanym viektaram ciahi.
Ciapier tolki ZŠA majuć bajazdolnyja źniščalniki 5-ha pakaleńnia — F-22 Raptor, jakija nikomu nie pradajuć. Taksama amierykancy ŭžo pabudavali i zrabili sotni vyletaŭ na bolš prostych i ŭniviersalnych źniščalnikach 5-ha pakaleńnia F-35. F-35 ZŠA vyrablajuć dla ŭłasnych uzbrojenych sił i prapanujuć svaim chaŭruśnikam.
