Mužčyna, jaki pamior ranicaj 22 krasavika ŭ pryvatnym miedcentry «Ekamiedservis», nie byŭ jaho pacyjentam, a supravadžaŭ svaju sužycielku, jakaja pryjechała ŭ Minsk na abśledavańnie.
Pra heta paviedamiŭ pres-aficer UUS Kastryčnickaha rajona Minska Leanid Ušenin.
Raniej va UUS Kastryčnickaha rajona Minska zajavili, što abśledavacca ŭ miedcentry płanavaŭ sam mužčyna — žychar Rečycy 1952 hoda naradžeńnia. Jamu stała błaha padčas čakańnia pryjomu ŭ kalidory, «miedyki sprabavali jaho vyratavać, ale ŭ 8.05 zafiksavali śmierć», skazaŭ pres-aficer. Pavodle papiaredniaj infarmacyi, mužčyna pamior ad trambozu, ale «kančatkovyja vysnovy buduć zroblenyja paśla praviadzieńnia sudmiedekśpiertyzy», dadaŭ jon.
Paźniej va UUS udakładnili, što prajści abśledavańnie płanavaŭ nie pamierły, a jaho sužycielka. Pavodle jaje słoŭ, raniej mužčyna nie znachodziŭsia na miedycynskim uliku, zaznačyŭ pres-aficer.
Pra NZ u «Ekamiedservisie» stała viadoma ad vidavočcy. Pacyjentka miedcentra raskazała BiełaPAN, što siońnia kala 10.00 u chole kliniki lažaŭ nakryty praścinoj čałaviek, pobač znachodzilisia lekary i milicyjanier. Na pytańnie, što zdaryłasia, adna z supracoŭnic kliniki adkazała, što mužčyna pamior ad sardečnaha prystupu.
Kamientavać situacyju ŭ «Ekamiedservisie» admovilisia.
