«Okiean Jelzi» prezientavaŭ novuju pieśniu i klip da jaje pad nazvaj «Nie jdi». Premjera videa adbyłasia na aficyjnym kanale hurtu ŭ YouTube. Usieŭkrainskaja radyjopremjera sinhła zapłanavanaja na 21 krasavika.
«Nie jdi» — sinhł ź dziaviataha alboma OJE, nad jakim siońnia pracujuć muzyki hurtu. Asnoŭnyja zdymki prachodzili ŭ Hruzii, a kadry pry ŭdziele muzykaŭ OJE byli źniatyja va Ukrainie, pad Kijevam.
U klipie pakazanaja historyja maładoj pary, jakaja buduje dom. Na fonie pryhožych hornych piejzažaŭ ich zaśpieŭ doždž, i maładyja ludzi vymušanyja chavacca ad jaho ŭ mašynie.
Lider OJE Śviatasłaŭ Vakarčuk raspaviadaje: «Režysioram videa staŭ Ihar Ściekalenka, jaki ŭ svoj čas razam z bratam Alaksandram źniaŭ niekalki klipaŭ OJE, jakija stali dla nas kultavymi. Ja daviaraju jaho intuicyi, i kali Ihar, pasłuchaŭšy pieśniu, prapanavaŭ takuju fiłasofskuju historyju, to adrazu pahadziŭsia na hetuju ideju. Darečy, źjaŭleńnie ŭ kadry hrupy ŭ aŭto, padobnym na toje, jakoje možna ŭbačyć u klipie «911», było majoj idejaj. Pakolki mienavita Ihar źniaŭ toje videa šmat hadoŭ tamu, ja prapanavaŭ źjavicca nam usioj hrupaj u kadry ŭ vielmi padobnaj mašynie. Heta dadało asablivy, mietafizičny sens».
Režysior Ihar Ściekalenka dzielicca: «Pasłuchaŭšy pieśniu, ja zrazumieŭ, što historyja, raskazanaja ŭ joj, pavinna być pradstaŭlenaja na ekranie šyrej, čym prosta malunki-ilustracyi z žyćcia dvuch čałaviek. Ja šukaŭ mietafary, jakija b raskryli psichałahičnuju formułu stasunkaŭ hierojaŭ. Jak praviła, muzyčnyja videa hruntujucca na estetyčnych, vizualnych vobrazach. U hetym ža vypadku nam z kamandaj było cikaviej šukać inšyja, bolš składanyja simvały. Spadziajusia, u nas atrymałasia videa, jakoje kožny hladač, u kantekście pieśni, budzie interpretavać dla siabie sam».
10 śniežnia muzyki «Okiean Jelzi» vystupiać na scenie «Minsk-Areny» ŭ ramkach suśvietnaha tura, jaki startuje hetaj viasnoj. U im značacca krainy Jeŭropy, Paŭnočnaj Amieryki i Blizkaha Uschodu.
