Pravaabaroncy buduć sačyć za vykanańniem pravoŭ biznesoŭcaŭ Juryja Čyža i Jaŭhiena Baskina padčas śledztva i ŭtrymańnia pad vartaj, choć sami hetyja kryminalnyja spravy nie ŭvachodziać u koła intaresaŭ pravaabaroncaŭ.
Pra heta zajaviŭ Svabodzie kiraŭnik začynienaha ŭładami Pravaabarončaha centra «Viasna» Aleś Bialacki.
«Kali buduć dadzienyja, što da ich, naprykład, užyvajucca niedazvolenyja metady dopytu, što na ich akazvajecca cisk padčas śledztva, naturalna, što takija dadzienyja my ahučvajem, źbirajem i analizujem. Nas cikaviać umovy ŭtrymańnia, umovy śledztva adnosna ŭsich hramadzian Biełarusi — heta ŭvachodzić u koła zacikaŭlenaściaŭ pravaabarončych arhanizacyjaŭ. Ale spravy hetyja nie źjaŭlajucca palityčna matyvavanymi, tamu pa sutnaści svajoj heta nia naša sfera», — padkreśliŭ jon.
Cikava, što Juryju Čyžu pradjaŭlena abvinavačvańnie pa tym ža artykule, pa jakim byŭ u 2011 hodzie asudžany Aleś Bialacki — uchileńnie ad vypłaty padatkaŭ i zboraŭ u asabliva bujnym pamiery.
Były palitviazień stavicca da hetaj akaličnaści z humaram:
«Ja dumaju nam było b pra što ź im parazmaŭlać, kali b my apynulisia ŭ adnoj kamery. Hety artykuł vielmi raściahnuty: tam miery pakarańnia ad «chimii» da 7 hadoŭ turemnaha źniavoleńnia. I heta daje peŭnyja mahčymaści dla torhu. Ja zhodny sa Śviatłanaj Kalinkinaj, što Čyža buduć zaraz prosta «stryhčy», šantažavać peŭnym čynam, prymušać addać jak maha bolš hrošaj — i za heta suprać jaho, moža, buduć užytyja nie takija surovyja miery pakarańnia.
Što tyčycca majoj spravy, to tam takoha adkrytaha torhu nie było, choć prakuror kazaŭ, što kali b pryznaŭ vinu, to prakuratura ŭličyła b heta. U spravie Čyža šmat što zaležyć ad jaho samoha, ad jaho linii pavodzin», — kaža jon.
