Pradstaŭniki hramadzianskaj inicyjatyvy «Ekśpierty ŭ abaronu Kurapataŭ» abviaścili ab pačatku adkrytaha tvorčaha konkursu idej i prajektaŭ, pryśviečanaha achviaram stalinskich represij, pachavanych va ŭročyščy Kurapaty pad Minskam.
Jak paviedamiŭ na pres-kanfierencyi 10 sakavika adzin z arhanizataraŭ konkursu žurnalist Marat Haravy, hałoŭnaja meta — «padšturchnuć biełaruskaje hramadstva da idei pakajańnia za svabodny abo vymušany ŭdzieł u złačynstvach tatalitarnaha režymu». «Kurapaty paŭtoracca, kali ŭ nas budzie nie nacyja, a natoŭp. Jany bolš nie buduć paŭtaracca tolki ŭ tym vypadku, kali ludzi, svabodnyja, što ŭśviedamlajuć strašnuju niebiaśpieku tatalitaryzmu, jakaja moža pryvieści da novych Kurapataŭ, abjadnajucca», — adznačyŭ jon.
Pieršapačatkova «Ekśpierty ŭ abaronu Kurapataŭ» płanavali arhanizavać konkurs na lepšy prajekt miemaryjalizacyi hetaha miesca masavych pachavańniaŭ, ale paźniej było vyrašana pašyryć umovy tvorčaha spabornictva, kab u im mahli ŭziać udzieł ludzi, jakija pracujuć u roznych žanrach vyjaŭlenčaha mastactva.
«My vyrašyli pravieści nie prosta konkurs prajektaŭ miemaryjała, jak heta było ŭ 1990-ja hady, — adznačyŭ raspracoŭščyk umoŭ konkursu kulturołah Vacłaŭ Areška. — Paśla letašniaj vystavy pa Kurapatach my ŭbačyli, kolki cikavych rabot moža źjavicca ŭ mastakoŭ, a ŭ pierśpiektyvie i ŭ tvorcaŭ u inšych vidach mastactva, piśmieńnikaŭ».
Tak, akramia architekturnych prajektaŭ pa miemaryjalizacyi Kurapataŭ, arhanizatary konkursu čakajuć ad udzielnikaŭ makiety skulptur, žyvapisnyja pałotny, tvory hrafiki i fotahrafiki, art-abjekty i videainstalacyi. Konkursnyja raboty mohuć być pryśviečanyja Kurapatam jak narodnamu miemaryjału; histaryčnaj pamiaci i pakajańniu; trahiedyi biełaruskaha naroda i asobnaha čałavieka, jaki staŭ achviaraj represiŭnaj palityčnaj sistemy savieckaha pieryjadu.
Patencyjnyja ŭdzielniki tvorčaha spabornictva mohuć dasyłać svaje pracy ŭ elektronnym vyhladzie až da 31 žniŭnia. Žury konkursu da 15 kastryčnika adbiare šerah rabot, jakija paśla buduć vystaŭleny na druhoj dakumientalna-mastackaj vystavie «Praŭda pra Kurapaty».
U najbližejšy čas arhanizatary konkursu abnarodujuć kantaktnuju infarmacyju, a taksama adrasy, na jakija ŭdzielniki zmohuć vysyłać svaje pracy.
Miarkujecca, što anałahičny konkurs budzie praviedzieny i ŭ 2017 hodzie. Takim čynam, pradstaŭniki hramadzianskaj supolnaści akumulujuć tvorčyja idei, jakimi ŭ budučyni možna budzie dapoŭnić užo isnujučy narodny miemaryjał va ŭročyščy.
Dapamahčy z arhanizacyjaj konkursu pahadzilisia pradstaŭniki supołki «Pahonia» Biełaruskaha sajuza mastakoŭ, Biełaruskaj asacyjacyi žurnalistaŭ, Sajuza biełaruskich piśmieńnikaŭ, Asamblei niaŭradavych demakratyčnych arhanizacyj, Biełaruskaj asacyjacyi achviar palityčnych represij, hramadskich abjadnańniaŭ «Chryścijanskaja złučanaść «Kurapaty»,»Dyjaryjuš» i «Centr «Supolnaść», hramadskaha elektronnaha archiva «Vytoki», Prafsajuza rabotnikaŭ radyjoelektronnaj pramysłovaści (REP), niekamiercyjnaj arhanizacyi «Art Siadziba», a taksama likvidavanaha ŭładami pravaabarončaha centra «Viasna».
Da supracoŭnictva taksama buduć zaprošanyja «Tavarystva biełaruskaj movy imia Franciška Skaryny», Rada biełaruskaj intelihiencyi i mižnarodnaje hramadskaje abjadnańnie «Zhurtavańnie biełarusaŭ śvietu «Baćkaŭščyna».
