2 sakavika, napiaredadni prafiesijnaha śviata, praparščyk Čyhunačnaha adździeła departamienta achovy horada Viciebska Siarhiej Batałka zakryŭ saboj dzicia ad najezdu mašyny, i jana źbiła jaho samoha. Adrazu paśla paviedamleńniaŭ pra hety ŭčynak milicyjanier staŭ samym miedyjnym supracoŭnikam pravaachoŭnych orhanaŭ u našaj krainie. TUT.BY pavinšavaŭ Siarhieja z Dniom milicyi i daviedaŭsia padrabiaznaści zdareńnia.
U toj viečar Siarhiej viartaŭsia ź dziažurstva, išoŭ u adździeł departamienta na vulicy Budzionnaha — zdać zbroju.
— Zaŭsiody chadžu hetaj darohaj, pa hetym piešachodnym pierachodzie. A tut tak skłałasia — vyratavaŭ čałavieka, — kaža praparščyk Batałka. U jaho hołasie niama pafasu, svoj učynak jon nie ličyć hierojstvam i stvaraje ŭražańnie ścipłaha, navat troški saramlivaha čałavieka. Hałoŭnaje — što ŭ patrebny momant zmoh pastupić vielmi rašuča.
Usio adbyłosia imhnienna: schapiŭ chłapčuka, paviarnuŭ jaho, my ŭpali. Navat nie viedaju, jak heta rastłumačyć. Prosta ŭ toj momant ja byŭ uvieś va ŭvazie, nastroiŭsia na pierachod prajeznaj častki, nie dumaŭ pra niešta pabočnaje. Tym, napeŭna, i adroźnivajecca supracoŭnik milicyi, što jon zaŭsiody na słužbie — niezaležna ad taho, u formie jon ci cyvilnym. I zaŭsiody abaviazany akazać dapamohu — u vypadku nieabchodnaści.
— Siarhiej, heta videa pahladzieli bolš za 400 tys. čałaviek. Vaš učynak aktyŭna abmiarkoŭvajuć. Adnovicie tyja padziei jašče raz: jak usio było?
— Pieršy šerah mašyn spyniŭsia, druhi — taksama. Usio było biaśpiečna. Chłopčyk zrazumieŭ, što jamu ništo nie pahražaje, i pačaŭ pierachodzić vulicu. Ale, vyjšaŭšy na darohu, ja pabačyŭ, što mašyna ruchajecca pa tramvajnych šlachach, na chutkaści prykładna 50—60 km. Treba było prymać miery. Kali b chłopčyk pajšoŭ dalej, było b sutyknieńnie, mahčyma, strašnaja trahiedyja. Ja jaho vyrvaŭ, i ŭsio skončyłasia dobra. Ciapier u internecie pišuć ŭsiakaje: nibyta chłopčyk moh pajści prosta, i ja nie pavinien byŭ jaho čapać. Ale ja liču, što majo rašeńnie było pravilnym u dadzienaj situacyi. Kiroŭca realna ihnaravaŭ PDR. Paźniej ja daviedaŭsia, što Mikita — amal adnahodak maich synoŭ.
U siamji Batałki — 10-hadovyja chłopčyki-bliźniaty. Mikitu Praciuku, vyratavanamu na pierachodzie, 11.
Pa słovach Siarhieja, paśla zdareńnia kiroŭca byŭ u razhublenaści, spačatku nie moh ničoha patłumačyć. Uładalniku «Piežo» — 59 hadoŭ, jon pracavaŭ u padatkovaj inśpiekcyi. Mužčynu pazbavili pravoŭ i pryciahnuli da administracyjnaj adkaznaści pa č.1 art. 18.17 i č. 5 art. 18.22 KaAP.
U DAI patelefanavaŭ nie milicyjanier, a vidavočcy — kiroŭcy mašyn u dvuch pałosach, jakija spynilisia, kab sastupić darohu piešachodam. Adna z žančyn-śviedak pradastaviła inśpiektaram zapis videarehistratara ŭ svaim aŭtamabili.
— Vidavočcy taksama byli hatovyja vyklikać chutkuju, - dzielicca Siarhiej. — Paśla ŭdaru my ź Mikitam upali na darohu, na videa bačna, što troški adskočyli. Ź dziciem usio ŭ paradku, a ja spačatku bolš nie adčuvaŭ bolu, ale potym na haloncy źjaviłasia puchlina. Troški balić i siońnia. Ale nie strašna, ja pracazdolny, zaŭtra ŭžo prystupaju da niasieńnia słužby. Učora i siońnia ŭ mianie byli vychodnyja.
Napiaredadni na miesca zdareńnia pryjazdžali baćki šaścikłaśnika Mikity. Im pakazali videa ź miesca padziej. Mama padziakavała milicyjantu. A tata navat płakaŭ. «Mianie, viadoma, kranuli hetyja mužčynskija ślozy», — pryznaŭsia Siarhiej.
— Viadoma ž, my ŭdziačnyja supracoŭniku milicyi. U jaho samoha — dva syny, i jany amal takoha ž uzrostu, jak i naš Mikita. Jaho chłopčykam — 10 hadoŭ, a našamu — chutka spoŭnicca 12. Mikita ŭ toj viečar viartaŭsia sa škoły pa hetaj darozie, choć zvyčajna jon chodzić inšym šlacham. Źbieh abstavinaŭ, — raspaviała mama Mikity, Julija Praciuk.
U praparščyka Batałki byŭ jašče adzin vypadak, kali jamu daviałosia chutka reahavać na situacyju: «Viartaŭsia z pracy, a ŭ aŭtobusie jechaŭ mužčyna, jaki dastaŭ siakieru. Uźnikła panika, zakryčali žančyny i dzieci. My ź jašče adnym pasažyram niejtralizavali chulihana i jaho pryładu».
Siarhiej pracuje ŭ orhanach MUS 13 hadoŭ: «Pajšoŭ pa śladach baćki, jon padpałkoŭnik milicyi, byŭ namieśnikam načalnika hetaha ž samaha adździeła, dzie pracuju ja. U departamient achovy pryjšoŭ paśla słužby ŭ vojsku, prachodziŭ jaje va ŭnutranych vojskach».
